هناء مربط الفرس هنا الارض الخصبة للوسواس ولجميع الافكار السلبية :: الــــــــفـــــــــراغ

بسبب هذا الفرغ العقل جالس يشتغل ويعبي هالفراغ مثل كاسه عندك فاضيه انت راح تعبي فيها مويه على طول لكن مجرد ماتتحرك الكاس الماء بيروح يمين يسار ما تقدري تتمكني من السيطرة على تعبئه الكاسة

الوسواس كذاا يتعامل معنا شافنا جالسين لا نقراء كتاب لا نحاول نخرج ما نمشي وووو جالسين لها نقوله هات اي فكرة عندك احنا مستعدين وهوا مو مقصررر

ولا تنسين القاعدة فكرنا او ما فكرناا بالموت .. ما راح يقدم او ياخر التفكير بحياتنا ..
هل فعلا من يزور اصدقائه واقاربه ويخرج يموت ومن يجلس بالبيت يظل طول عمره ما يموت !!!!؟؟

تأملي فيها مره ثانيه ....


إذا فعلا التفكير او الخروج ما له علاقه بالموت معناه كل هالامور هيا افكار وسواسية افكار وسواسية افكار وسواسية

كم شخص فكر وكم شخص وسوس فيها والعالم مليان فيهم والحمدلله عايشين ..


طيب كيف التخلص من الافكار وحالات التوتر والقلق ..

اقولها لك ان شاء الله ...............

اقول غاسلين شراعك اليوم غاسلينه لين تفوقين
مين قالك انتي لوحدك الي تحسين بالخوف هل كشفتي على قلوبهم
ليش تتوقعين أن خوفك يكفي العالم كله تهويل وتفخيم
فيه ناس من الخوف ما تطلع من غرفتها ولا تتكلم وانتي تسولفي وتتكلمي يعني على الحلو تكه
بمعنى انتي احسن من ملايين من الناس
بعدين كم لك توسوسين بالأمراض فتره طويله اكيد
ولا جاك شي
اعقلي وشوفي اي شي يشغل بالك حتى لو تالمتي بالبدايه

اقدر اشغل نفسي عنه و اقدر بس لما اشغل نفسي اقول اخاف يجيني شي وانا مو منتبهه له فهمت شلون
يعني اقول اخاف اشغل نفسي و كيذا و أنسى بعدين يصير لي شي هو اقوا مني يجيب اشياء و أفكار مدري شلون والله العظيم
و حتى احيانا اقول خير ياطير خل أمرض و اموت عادي كلنا بنموت بس لمن افكر بسكرات الموت و أني بشوف الملائكه يمممه وربي اخاف
اقول كيف بيكون حالي الحين اذا جايني ضيق تنفس مدري وش يصير فيني اجل شلون لمن تطلع روحي
معليش على هالكلام بس ابي أوصل لكم انا وش احس فيه بالضبط !!

يعني مثلا اقدر اشغل نفسي بالمطبخ او اقرأ كتاب او ازور صديقاتي
بس اخاف اشغل نفسي ويجيني شي
انا ادري ان افكاري تقهر و ماهي طبيعيه بس امانه لحد يقسى هذا الشي غصب عني
و حتى لمن أتكلم مع احد ارتاح كم يوم و ارجع ثاني مره
مره الحياه مالها طعم بنظري):

اختي الكريمة

مادامك تكتبي بكل هذة الأريحية فأنتي بخير

و استاهل جلد بعد وقليل علي اي صادق ياربي بك الحمد انا احس من ناس واجد
بس بنفس الوقت احس الحياه صعبه و مو وناسه احيانا اقول ليت ابونا آدم ما اكل من الشجره و الحين حنا بالجنه علطول
استغفرالله بس والله كله من هالافكار و البلاوي اللي مدري وين بتوديني تعرف ايش معنا كارهه كل شي حتى وربي لمن اطالع وجهي بالمرايه
و انت بكرامه ادفل على المرايه وامشي بسرعه كارهه حتى نفسي

الله يسمع منك

هههههههه😃😃😃😃هههههه هههههههه😃😃😃😃هههههه
يابنت الاجواد ارفقي على نفسك يقول الشاعر الونيس ساعة الفله لا تفوتك
اي لحظه فيها ونس عيشيها بكل تفاصيلها والي يسير يسير
بعدين تقولي اخاف يسير شي وانا مو منتبهه يعني وش بتسوي
مو بساير الا كل خير

سبحان الله نفس المخاوف ونفس التفكير سبحان الله نفس تفكيرك اجلس مع الناس وانا بالي بمحل اخر اشوف العالم واقول ماشاء الله عليهم مايفكرون واتذكر قبل لما ماكنت اخاف صرت احب اجلس لحالي واهووجس واحس محد يفهم الي بداخلي احسهم ملو من تفكيري والله اني حتى مليت من الصياح وكرهته شبعت من التفكير وشعري صار شيب وانا عمري 24 تصدقين ودي اتعرف عليك

يا عمممري والله انا بعد شعري كله شيب وأنا عمري 25
والله انك صادقه حتى انا مليت و تعبت من البكي
والله ياليت نتعرف على بعض ودي ب احد حاس باللي احس به

مواليد 1412؟ والله ياخيتي نفس تفكيري مره وزياده فيه اشياء ماقولها بسبب الوساوس ....لي 3 سنين في الوسواس القهري حتى ساعات تجي مناسبه ماروح اصير خلاص اصيييح مااقدر مابي احد يعرف اني اصيح..هواجيس وخوووف وقلق ساعات اعض نفسي مع كثر القلق واغلب وقتي احاول انام عشان ماافكر ....ودي فعلا لان سبحان الله نفس العمر ونفس التفكير

والوساس ساعات يقولي لاتضحكين مهبوله انتي...ومره خلاص اصير ضايق صدري واصيييح واتلفلف في لحافي

ونشكر الاخوان اللي معي متفاعلين بالموضوع
الله يجزاهم خير

انا ايضا استفدت منهم

ماشاء الله الحمدلله انه فيه اوقات تشغلي نفسك وتشعري بشيء من الراحه الحمدلله ان شاء الله ما تحتاجي لا دكتور نفسي ولا ادوية بإذن الله


هذا هو الوسواس انه اخاف اشغل نفسي ويجيني شيء شنو بيجيك ..؟؟

اللي بيجيك او بيصير لك يجيك لو انت نايمه مشغوله فاضيه ... كل الحالات

فهذا الوسواس ما يبغاك تشغلي نفسك لانه طريق العلاج لك



هناك ثلاثه امور مهمه جدا جدا جدا

الصحه - الحالة الروحيه - وقت الفراغ


الحاله الصحية :
ابغاك في اقرب فرصه تعملي تحليل لجرثومه المعده وتشوفي القولون وفيتامين دال

وياليت ياليت ياليت يكون اليوم ..

يالله نبغى نشوفك تروحي وتعملي بس هالتحليلات البسيطه بس


الحالة الروحيه :
الحمدلله انك مسلمه فالحمدلله الامور بسيطه ان شاء الله
فقط ضيفي مع الصلاة كل يوم قراءه عدد من صفحات القران الكريم
الاستمرار والمداومه على الاستغفار
والدعاء في حاله السجود

وقت الفراغ :
اعملي جدول لوقتك
كل يوم لمدة نصف ساعه مشاهدة مقطع او محاضرة مفيده ومحفزة ( راي شخصي ارشح لك تسمعي للدكتور أحمد عمارة )

قراءه لمدة نصف ساعه في كتاب ( راي شخصي ارشح لك كتاب كيف تتخلص من القلق وتتمتع بالحياه .. ل ديل كارنيجي )
اليوم روحي اشتري الكتاب ..
واذا تحبي اشتريه لك وارسله لك ... المهم تقرائي كتب حلوه


اسف طولت عليك بالرد ( لاني بالعمل )

وطولت عليك بكثرة الكلام


وان شاء الله باقي الاخوان ما يقصرون معك ومعنا

انتي بس قولي يارب

ايوا مواليد 1412

طيب شلون نتواصل مع بعض يعني عادي لو اخذ رقمك ولا ممنوع
لان احس احسن لو نفضفض لبعض دام حنا نفس الأفكار و نفس العمر
يمكن نقدر نساعد بعض احس فيني الصيحه ودي اخمك من كثر ما احسك نفس افكاري

ياعمري انتي ياوخيييتي كنك اياني مررره وشكلك من نفس مدينتي بعد هذا سنابي

----------------


المشرف الوردي

ممنوع وضع وسائل التواصل على العام اتمنى الالتزام للقوانين والا سوف نعمل على ايقاف العضويه

غريب الهوى ابدعت وتالقت واحسنت النصيحه واستفدت يمكن أكثر من هلكانه كتاب دع القلق رائع قرأته واضيف كتاب جميل اسمه الرقص معا الحياه للكاتب الموسوي شكرا يا مبدعين
فيه حلقه لوليد فتيحي برنامج محياي 2 اسمها التوتر على التيوب رائعه افخم فخامه
دمتم بود 👌يا اصحابي