بصراحه انا لي اكثر من خمس سنوات وانا اعاني من نوبات الهلع تمر فترة اقول المرض هذا انتهى وفترة تحس فيه وبصراحه فكرة الدواء تستمر عليه سنة او اكثر بنتظام هذي مخوفتني ومتردد اخذه ادوية

اخوي احمد انا لي وجهة نظر بهالموضوع
لما اقارن بين حالتي مع الدواء وحالتي بدون دواء لا والله افضل لي استخدم الدواء سنه وسنتين ولا امر بالهلع والاكتئاب اللي مريت فيهم خاصة لما يكون الدواء مايضايقني بشي بصراحه .
ليش اقعد اقاوم الهلع والاضطراب النفسي وكل يوم اعراض مخيفه وكل يوم اعراض جديده ويروح العمر بدون متعه كله خوف وتوتر وقلق وتوجس .
الهلع والاكتئاب يوقفو عجلة الحياه يخلونك بدون هدف بدون دافعيه بدون أمل طول اليوم خايف ومنتظر شي مرعب بس ماتعرف ايش هو .. ليه هذا كله وربي سخر لنا الدواء وسخر لنا العلم والاطباء ؟
انا ارتحت وكان قراري سليم بكل صراحه قعدت اقاوم التعب والخوف والاكتئاب والدوخه ستة اشهر تقوقعت في البيت انعزلت عن مجتمعي وبعدين استخرت ربي واخذت الدواء والحمدلله .
طبعا هذي وجهة نظري وقناعتي انا يمكن تختلف معاي فيها وطبعا كل انسان ادرى بظروفه وحالته وقراراته .
الله يكتب لنا ولك الشفاء التام والراحه يارب

ابداً ما اختلف معك ولها فترة طويلة تراودني فكرة الدواء بس عندي كم سؤال
بداية اخذ الدواء كيف كان معاك من اعراض ... الخ وتنصحني بمستشفى حكومي او خاص

انا الحمدلله احس بتحسن بغض ا لنظر عن الاعراض المزعجه والمخيفه ولكن الحمدلله فيه تحسن انصحك تستشير بعدها تستخير وتتوكل على الله والله يغينا عنها بالشفاء عاجل غير اجل

بصراحه استشرت المقربين مني وهم اللي كانو ماهم مقتنعين بفكرة الدواء لكن انا تصارعت مع الازمة هذي اكثر من خمس سنوات وللآن مازلت اتصارع مابيني وبين الازمة هذي وشايف ان النتيجه هيا هيا مافيه اي تغير الا شيء لايذكر الان انا مقتنع بفكرة الدواء وبستخير الله واتؤكل عليه
ممكن تذكرين لي الاعراض المبدئيه لدواء خلال فترة استخدامك له وكيف بعد استخدامك له

بالاضافة تنصحيني اروح عيادة خاصه او مستشفى حكومي ؟

الاعراض العلاج ادخل على المواضيع الي سويتها وشوف الاعراض وكل الاخوان والاخوات مروا بنفس الاعراض انا حاليا على العلاج بس شهر فا ما اقدر اعطيك الراي الصح الا بعد فترة العلاج واتمنى الاخوان يفيدونك كثير يمدحون عيادة ميدي كير للدكتور البغدادي وفيه البروف عبدالله السبيعي في ادراك والله يكتب لك الصالح وادعي ربك واستخير

هلا اخوي احمد
بقولك شي وحطه قاعده براسك .. كل الامراض ممكن اللي حولك يشعرون فيك الا المرض النفسي محد يحس فيك الا انت ولا احد يتألم ويصارع الرعب اللي نشوفه الا احنا ومهما تشرح مشاعرك لغيرك اللي ماجرب لايمكن يفهمها .
انا ثنتين من صديقاتي كانو يعانون من الهلع ويحاولون يقنعوني بالدواء وكنت رافضه واتحمل واصبر الى ان تعبت وقربت انهار واستخرت ربي وتوكلت عليه .
الزبده لاتستشير احد لأنك وحدك اللي تعاني توكل على الله واستشير دكتور نفسي متمكن .
انا انصح بطبيب نفسي خاص عشان تقدر تاخذ وقتك معاه ويعرف يشخص حالتك بدقه . ابمستشفيات الحكوميه مواعيدها طويله واتوقع جلساتها لاتتعدى ربع ساعه .
اعراض الدواء بالبدايه تعبت امانة مابي اقولك الدواء سحري لا عانيت لكن ماكنت انظر للاعراض كنت انظر للامام وانتظر يوم الشفاء .
الاعراض تختلف من شخص لاخر والمده تختلف من شخص لاخر لكن الاغلبيه يبدأ التحسن بعد مرور ثلاثة اسابيع .
الله يكتب لك الخير والشفاء التام

مبتلاه مبروك حبيبتي اول الغيث ان شاء الله العافيه شوي شوي وبتشوفين التحسن اكثر واكثر طمنينا عليك

حبيبتي قطرات ندا الله يوفقك ويشرح صدرك وين ما تروحين انت دافع قوي لي بعد الله انت وابن دايم و زمالك ومتارجح احمد لؤي وكل من رد علي الله يوفقكم صح اني اعاني مع الاعراض معاناة ما يعلم فيه الا رب العالمين ولكن زي ما قلتي اول الغيث قطره والله يعين وان شاء الله وانا متاكده من الله هو الشافي المعافي بحط مفطح واعزمكم كلكم 😍

ههههههههههه عساك على القوه مبتلاه .. خلاص ننتظر تبشرينا بتمام العافيه والعزيمه

طمنونا كيف صحتكم وكيف اموركم

الحمد لله فيه تحسن لولا الاعراض ولكن بداية الغيث قطره انت بشرنا عنك وصار معاك

اختي قطرات ندا كيف الحال امس باليل جتني نوبة هلع ولكنها خفيفه الحمدلله يالله شي يخوف من زمان عنها وجتني امس هل السيروكسات يجيب النوبات و الشد باقي معاي في راسي مع ثقل الرجل واليدين الحمدلله على كل حال

هلا حبيبتي مبتلاه
لا السيروكسات مايجيب نوبات اللي اعرفه عنه لكنك لسا بجور التشافي والعلاج ياخذ لايقل عن سته شهور عشان تبدين تستقرين نفسيا وجسديا .. اي نوبه تجيك قوليلها ياهلا وسهلا يالله سوي اعراضك وفارقيني واستسلمي لها تلقينها تنكسر حدتها وتختفي .
صدقيني انا مريت بهالشي لاتخافين ابد .. بتناوشك شوي زي اللي تجيك من كل ثغره الى حد ماتيأس .
طمنينا عليك