|
استشاره بخصوص حالتي واذا تنصحوني ابدأ مشوار الأدوية ؟
السلام عليكم
حابه استشيركم بحالتي وياليت تساعدوني .. ( عارفه ان الموضوع طوييل بس اتمنى تقرونه كامل و تعطوني رايكم ) من كم شهر تقريبا دخلت في حالة اكتئاب ( وكانت اول مرة بحياتي اعيش هالاحساس) .. بس كانت لسبب معين و انتهى هالسبب ومرت فترة و غيرت جو ورجعت حسيت اني طبيعية بس من شهر رجعت لي حالة الاكتئاب اقوى بكثير صرت احس دايما بالحزن و الفراغ والوحدة و التعب والكسل و الخمول وما اطلع من البيت الا للدوام واتفادى اي طلعه او مناسبة وهالمرة مافي سبب معين يعني مافي شي تغير ولا شي جديد صار ! قعدت افكر وش ممكن يكون السبب و كان الموضوع الوحيد اللي فعلا مضايقني هو وزني مع العلم انه مو اني كل يوم افكر في وزني وازعل! لا ابدا ! ولا عندي هوس الشكل نهائيا بس احس هو الشي اللي سبب الاكتئاب لانه لي فترة طويلة احاول انقص وزني بس نزولي بطيء ( وللامانه مالتزم دايما) مع العلم ان وزني معقول بس انا مب مقتنعه فيه ومريت بفترات التزمت فيها بالدايت والرياضه 100٪ بس ماكان فيه نزول او انه شي بسيط و هالشي كان يسبب لي احباط و احط حرتي فالاكل و ارجع احس بالذنب و احس اني فشلت و خلاص اقرر بعدين ببدا و ابدا و يصير نفس الموضوع و ادور في هالدوامه . يمكن الموضوع يعتبر بسيط في نظر البعض بس بالنسبة لي كبير لانه مضايقني و في الفترة الاخيرة احس صارت تجيني حالات شراهه ابي اكل و الاكل يشغل كل تفكيري و في نفس الوقت حزينة جدا قررت اروح دكتور نفسي ..( وكل اللي في بالي اني بحاجة جلسات نفسيه او سلوكية وخلاص ابدا مب متخيله اني احتاج ادوية) شرحت له الموضوع قالي انتي مكبره الموضوع لانه شكلج عادي ! وعلى طول و صف لي دوا !!! على اي اساس مادري .. ماصرفت الدوا وقررت اروح عند غيره الدكتور الثاني قالي انه عندي اكتئاب و وصف لي فلوكستين 40 مل في اليوم + جلسات نفسية اسبوعيا عند دكتورة ثانية صرفت الدوا بس ما اخذته لاني ماقتنعت اني احتاجه احس حالتي مب لهالدرجة و فكرت ممكن الجلسات النفسية تكفي .. رحت اول جلسة نفسية و صراحة كان الوضع مضحك نوعا ما .. الدكتورة صارت تشرح لي عن الاكل الصحي و تقولي روحي الرياضه و قالت لي مافي شي اقدر اسويه !! مع انه في شي في الطب النفسي اسمه Eating Disorder فكيف دكتورة نفسية تقولي مافي شي اقدر اسويه ! و نصحتني اخذ الفلوكستين اللي هو ( بروزاك) عشان بعد هو يسد الشهيه و بس هذي قصتي مع الدكاترة النفسيين حاليا اعاني من فترة تقلب قبل اسبوع تقريبا كنت احس انه عادي الوضع مب سيء لهالدرجة و اقدر اقاوم و اطلع من هالحاله بنفسي بدون ادوية بس في اوقات نفس اليوم احس اني قاعدة اغرق في الاكتئاب ومحتاجة المساعدة بأي شكل قريت عن الدوا طبعا و شفت اراء ايجابية و اراء تقول الادوية هي اللي دمرتهم شرايكم اخذ الدوا ولا لا ؟ يعني اليوم مثلا احس اني مكتئبببببة فعلا و الدنيا سودا ومابي اكلم احد ولا ابي اقابل احد حتى عندي موعد مستشفى مهم مارحت له لاني مالي خلق اي شي ولي اسبوع مارحت الجيم الوزن صح شاغل بالي بس الاكتئاب اكثر و ترى اتابع مع دكتورة تغذية + مشتركة في الجيم يعني من ناحية الوزن مسويه كل اللي اقدر عليه و الحمدلله قاعدة اجبر نفسي ع الدوام و الحمدلله ملتزمة بالشغل وقدام الناس ابين طبيعية و مابين لهم شي هل تشوفون انه اسهل اخذ الدوا و افتك من هالاحساس ولا الادوية مضارها اكثر ؟ وهل فيكم احد تغلب ع الاكتئاب بدون ادوية ؟ و هل فيه احد ندم ع الادوية ؟ محتاجة اراءكم ؟ |
وعليكم السلام ..
خلي الدوا اخر شي تفكرين فيييييه اول شي سوي تحليل للغده الدرقيه عندك لان اضطراب الغده يسبب اكتئاب ومهما سويتي دايت ورياضه الوزن ماينقص بسبب هالاضطراب ، ثاني شي الكل مر في هالحاله وانا أولهم مر علي شهريييين عشت فيهم مشاعر غريبه ماقدر حتى اعبر عنها لدرجة انو رجولي ترجف لحالها من قوة الاكتئاب والقلق اللي عندي والخوف اللي ماله مبرر ، ما اطلع من البيت تركت وظيفتي ، ماحضرت مناسبات مهمه كان لازم احضرها ، بس كل هالمشاعر صارت تخف بالتدريج صرت احاول احقر الافكار اللي تسبب لي هالمشاعر والاكتئاب ، صرت لما اصحى من نومي اقول اليوم انا بكون مبسوطه وماراح ارد على اي شعور سلبي .. صرت كل يوم اصلي الوتر واقرأ كم صفحه من سورة البقره وحافظت على الأذكار يوميا الصباح والمساء وأذكار النوم وآيات السكينه واردد بكل صلاة " اللهم ياولي نعمتي وياملاذي عند كربتي اجعل ما اخافه واحذره بردا وسلاما علي كما جعلت النار بردا وسلاما على ابراهيم " وصرت اسوي تمارين الاسترخاء كل يوم الصباح ودخلت نادي وصرت اسوي رياضه والحمدلله لي تقريبا اربع ايام احس اني رجعت طبيعيه ، وحطي براسك شغله ان ربي مايبتلي شخص بشي فوق طاقته ابدا ربي عارف انك بتتحملين هالشي وبتصبرين وكله بأجر وبتعدينه ، وبرضو اعرفي ان كل شي مصيره بيتغير حتى هالمشاعر السيئه بيجي يوم وتضحكين عليها وعلى سخافتها وتقولين شلون كنت افكر كذا .. عشان كذا وسعي صدرك وتأكدي انو هالشعور السيء بينتهي بإذن الله قريبا ، وماتشوفين شر يارب |
الدواء خذيه اذا وصلتي مرحلة عدم النوم
فقدان الشهيه عدم مزاولة اي عمل اذا وصلتي للمرحله هذي هنا تحتاجين دواء |
أولاً .. انا اهنيك على تفكيرك الذكي و الرائع
بتقولين ليه ؟ بقولك لانك من أول ما حسيتي بأعراض الأكتئاب رحتي علطول للأطباء و ما صبرتي مثل اغلب الناس وهذا شيء جيد فيك ثانيا .. بحسب ما تقولين انه فيه اجماع من الاطباء اللي زرتيهم بدواء بروزاك نصيحتي لك لا تترددين بأخذ الدواء . الدواء النفسي نعمة من الله الشيء الوحيد اللي تحسفت عليه من الادوية النفسية هو انني ندمت على الايام اللي راحت و ما أخذت فيها الادوية !! |
الدوا نعمه من الله....انصحك وبقوه في اخذ الدواء وخاصة البروزاك لانه ماله اعراض جانبيه مزعجه وراح تلاحظي تحسن كبير بعد الاسبوع الثالث وتندمي انك مااستغملتي الدواء من زمان
|
يا اختي انصحك بعدم التفكير في استخدام الدواء النفسي اطلاقا لانك تعانين من السمنة وزيادة الوزن يعني جسمك معرض للسمنة اكثر من غيرك
ولو استخدمتي الدواء ستصبحين مثل منطاد الحرب العالمية الأولى من شدة السمنة ومضادات الاكتئاب جميعها بدون استثناء تسبب زيادة في الوزن سواء كانت الزيادة بسيطة او كبيرة باستثناء دواء البوبروبيون واكتئابك من النوع المتوسط الى الخفيف ولا يحتاج ابدا اي مضاد اكتئاب استمري فقط على صلاة آخر الليل والدعاء وباذن الله حالتك بتتحسن وسوي كشف للغدة الدرقية عشان تتأكدين ان سبب سمنتك واكتئابك ليس سبب عضوي وياليت الزمان يعود بي للخلف كان ما وضعت في فمي حبة دواء نفسي واحدة لاني اصبحت اسير لهذه الادوية اللعينة |
السلام عليكم ورحمة الله وبركاته. مضادات للإكتأب أنصحك بستعمالها في حالة أنك لم تستطيعي الحياة عادية وعندك وسواس قهري رهيب وصداع رأس رهيب ولم تعودي تحسين بطعم الحياة. أما إن كان إكتأب متوسط يمكن إزالته فهذا لا داعي للمضادات لأنها فقط للإكتأب الحاد. نسأل الله لنا ولكم الشفاء.
|
اقتباس:
شكرا اخت وشم ع الرد والتشجيع الحمدلله سويت تحليل الغدة و طلعت سليمه والله قاعده احاول اكون ايجابية واقاوم بس للاسف اوقات النفسية تكون غلط مهما سويت الحمدلله على كل حال و ان شاء الله مثل ما قلتي فترة وتعدي يااااااارب كلامج عطاني امل .. مشكوره و ان شاءالله ربي يهونها ع الجميع |
اقتباس:
الحمدلله ماوصلت لهالمرحلة عندي مشاكل بالنوم و عندي زيااادة شهية ومبدئيا قررت ااجل قرار اخذ الدوا واحاول بنفسي محاولة اخيره .. الله يسهلها |
اقتباس:
شكرا من ذوقك ( مو متاكدة اذا اخ او اخت فجر ) بالنسبة للبروزاك الدكتورة الاولى وصفت لي دوا غيره مو متذكره الاسم لاني ماصرفته بس الدكتوره الاخيره وصفت لي بروزاك عندي استفسار ... ما تفكر (ين) اذا تركت الادوية شلون بيكون الوضع ؟ اخاف اتعود عليها ! |
اقتباس:
شكرا اخ متحري .. صراحه قررت اعطي نفسي مهله شهر واشوف اذا ماتحسنت راح اتوكل على الله وابدا الدواء |
اقتباس:
انا اللي سمعته ان البروزاك ينزل الوزن ! بس فعلا مثل ماذكرت احس اني ماحتاج الدواء حاليا .. راح اخلي الدواء اخر الخيارات الله يعينك ويشفينا ويشفيك ان شاءالله |
اقتباس:
الحمدلله اتوقع ان الاكتئاب اللي عندي متوسط ف بعطي نفسي فرصة للعلاج بدون دواء بس اكبر مشكلة عندي هي اني فعلا ماصرت احس بطعم الحياة للاسف شاكرة لك ردك اخي الكريم |
اقتباس:
هو اللي بيده كل شي المرض والشفا والسعاده والفرح وبإذن الله بتطلعين منها قريباااااا واستناك ترجعين تقولين لي انك تخلصتي من هالاحاسيس .. |
اقتباس:
آميييين يااارب فاهمه قصدج فعلا المفروض افكر بايجابية اكثر عموما الحمدلله احس نفسيتي احسن شووي هاليومين الله يسهلها ويفرجها من عنده شكرا وشم عزيزتي ماقصرتي |
اهلا مكتئبة
نصيحة من اعماق قلبي لا تنتظرين شهر لا تنظرين لكل اللي يقولك الدواء لا ينفع او اللي يقول لك اكتئابك ما يحتاج دواء يحتاج صلاه اخر الليل وووو كلن يفتي لك من راسه وهذا ما يصلح الاكتئاب مرض اثبتت الدراسات انه مرض عضوي ليس فقط اضطراب نفسي . يعني العلاج الدوائي له ضروري للغاية حالتك هذي تشبة كثيراً حالة شخص مصاب بمرض السكر و يقول أريد ان انتظر الى الشهر الجاي لعل مرضي يخف !! و يقومون الناس ينصحونه بأخذ أدوية عشبية وبالقرفة و القرنفل و ينصحونه بالمشي و بقيام الليل ووووو . هنا سؤال هل نصائح الناس تغني هذا المريض عن ما وصفه له الأطباء ؟ بكل تأكيد لا بل ممكن ان حالته تسوء اكثر اما بخصوص الادوية هل هي تعودية ام لا ؟ فأنا اصحح سؤالك وهو هل هذه الأدوية أدمانية أم لا ؟ هنا فيه فرق .. الادوية التعودية بمعنى اذا الشخص شخصت حالته بانه اكتئاب مزمن فهذا قد يأخذ الدواء طيلة حياته لكي ترجع له الحياه الطبيعية و يحس بطعم الحياه والسعادة و على حسب عدد نوبات الأكتئاب التي اصابتك كم مره اما الادمان فمعناتها انك تاخذين جرعة واحدة اليوم و بكرا تزودين الجرعة وبعده تزودين الجرعة اكثر ووو الى مالا نهاية وهذه الادوية مقيدة لا توصف الا بوصفة طبية في ورقة حمراء وللعلم ترى 95% من الأدوية النفسية غير ادمانية لذلك انصحك بدون تردد باخذ العلاج دامه موصوف لك من الأطباء أخوك الفجر القريب |
اقتباس:
أولا يعطيك العافية اخ فجر شاكرة ردك ثانيا .. فاهمه وجهة نظرك واتفق معك طبعا انه مرض حقيقي ولا ماكان من الاساس رحت للدكاترة اللي انا مفكره فيه انه ممكن تكون " نوبة اكتئاب " بدال ماتكون مرض .. يعني اقصد ممكن فترة وتعدي ان شاءالله .. < بس ادري انه ممكن يكون العكس تماما بس حابه اعطي نفسي فرصه و احاول اكثر .. مادري عندي امل انه اقدر اتجاوز هالحاله ان شاءالله ومن هنا قررت اعطي نفسي مهله اذا حسيت انه مافي شي تغير اكيد راح اخذ الدواء عموما حالتي متقلبه، حاليا احس اني احسن من قبل ف مستبعدة فكرة الدواء بس اذا ساءت الحاله افكر فيه طبعا .. قررت انتظر واشوف اذا اغلب الايام حالتي احسن ممكن يكون فيه امل بالنسبة للادوية و التعود او الادمان عليها .. عارفه انه مافيه ادمان و ممكن اوقف الدواء بأي وقت ابيه ( طبعا بالتدريج وتحت اشراف الدكتور ) بس اللي انا اقصده اخاف اتعود عليها من "الناحية النفسية" ،، يعني مثلا الحين اخذت الدوا و صارت حالتي ممتازه بقعد افكر يا ترى لو خليت الدوا بتبقى حالتي زينه او برجع اعيش الاكتئاب و اضطر اخذهم مره ثانية او ممكن بعدها تضعف ثقتي بنفسي واحس اني ماقدر اواجه الحياه بدون ادوية او مثلا كل ماضعفت او كان وضعي صعب اقول لو كنت مستمره ع الدواء ماكنت بهالحاله ،،، طبعا هذي كلها مجرد افكار افكر فيها حاليا وممكن وقتها ماتجي على بالي اصلا .. بس مابي ادخل نفسي هالدوامه النفسيه اذا فيه مجال اتجنبها راح احاول اتجنبها قدر الامكان او حاليا هاللي افكر فيه .. ممكن تفكيري يختلف بعدين مادري ! |
اقتباس:
و يوصف لك الدواء المناسب و في الوقت المناسب بيقولك أوقفي العلاج تدريجياً او يقولك استمري عليه. والأدوية ليست دوامة بل العكس صحيح , جلوسك كذا بدون علاج هو الدوامة الحقيقة !! المرض هو الدوامة و ليس الدواء . على فكرة . من متى بدأتي تحسين بالاكتئاب ؟ وكم مره مر عليك الاكتئاب ؟ |
اقتباس:
ورحت بعد مره ثانيه وكانت يعني " جلسة استرخاء " بس كانت مجرد شهيق و زفير .. صراحه اللي ع اليوتيوب احلى وافيد وبس ما قررت اذا بعطيهم فرصه هالاسبوع او لا لاني ماحسيت استفدت او حتى ارتحت معهم . |
اقتباس:
|
اقتباس:
توجد في الصيدليات اعشاب و اغذية تقلل اللشهية للطعام وتساعد على حرق السعرات الحرارية. |
| الساعة الآن 09:00 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا