ولله الحمد تشافيت من الهلع نهائي
 

شلونكم يامهلوعين شخباركم انا قديييييييييم فالمنتدى كنت مهلوع جدا والله ماكنت اذوق طعم النوم عايش في خووووووف ورعب على مدار الساعة عشت ايام الله لايعيدها ولا يوريكم مثلها وكنت 24 ساعة هني فهالمنتدى فعلا ساعدني كثير وكنا نساعد بعض وننصح بعض ونفضفض
انا الحين ولله الحمد مافيني الا العافيه الله شافاني من هالنوبات المرعبة وبدوووون اي علاج كميائي يعني حبوب صبرت علي نفسي وقاومت النوبات بفضل الله ثم التبصر بهالمرض بس كنت ابحث عن شي بقوقل وطلعلي المنتدى وقلت ادش اشوف شخباركم وابشركم ان بالاصرار والاتكال علي الله ممكن تتشافى من هالنوبات المرعبه ووالله ان الخروج من دائرة المرض مومثل ما انتو متصورين انه صعب لا والله سهل بس يبيله اصرار وثقه فالله
اي استفسار انا فالخدمة وارد عليكم

عليكم السلام ورحمة الله وبركاته
الحمدلله اخوي ، مبروك والله يتمم عليك الشفا ويديمه عليك
ولا يعيد لك هالمرض
بسالك انا وغيري عشان نستفيد
بخصوص نغزات القلب جتك ، وكم جلست معك

هلا فيك اخوي اجمعين يارب
نغزات القلب سببتلي مشكلة والله كانت علي طول معاي وتنميل واوجاع بالجزء اليمين
تدري كم مره يويت تخطيط قلب المستشفى حفضو وجهي من كثر ماسويت تخطيط علي فكرة هذي مو نغزات بالقلب القلب ماينغز هذي العضلات اللي بالصدر تنغزك وتخليك تحس ان هه خلاص الجلطه قربت
كنت اعيش برعب قسما بالله من هالسالفة بس اتضح انها اتفه من التفاهه والحين اضحك على هالايام اللي كنت فيها صدقني النوبه والوسواس يخلي العقل يعطيك نفس اعراض المرض اللي تفكر فيه سبحان الله
مشكلة النوبات انها تعيشك بفكرة معينه وتقتنع فيها وتحاول ادورلها على حلول واهي اصلا مش موجوده
تدري وصلت لمرحله شنو سويت
قلت الحين بفترض ان هذي النغزات مرض خله يجيني شبيصير يعني بموت كلنا بنموت بمرض ولا بغيره بمجرد ماتواجه الخوف يروح
اهي السالفة يبيلها شوي قوة اراده
والله يشافيكم اجمعين يارب
واي سؤال اسال انا موجود

انا مثلك ولكن الجزء الايسر الصدر والذراع شد والم
الله يجزاك خير يابعدي ويديم عليك العافيه والطمانينه 💜

انا اسف كتبت الايمن واهو الجزء الايسر من الجسم

لاتحاتي بتزين امورك
ضاقت ولما استحكمت حلقاتها فرجت وكنت اضنها لاتفرج
الله يشافيك وجميع المرضى يارب

ماشاء الله ربي يتم عليك العافية
أتوقع الرجال عندهم مقدرة اكبر للصبر
أو يمكن نوبات الهلع تختلف من شخص لآخر لا اعلم
اللي اعرفه عن نفسي إني ما اقدر أتحمل الخوف الشديد مدري وين بياخذني

تعبت من الحبوب. والشفاء من الله
شكرا لك ..

والله وبالله لما ضاقت فيني الدني وتعب من الهلع والخووووف دقت على الدكتور النفسي مالي وقلتله خلاص تعب ماني قادر اتحمل تعطيني حبوب مخدرات اي شي بس ابي اطلع من اللي انا فيه
قالي شوف انت استحملت كثير بدون حبوب ومابقى الا القليل وتطلع من هالدائرة استرجل وتحمل وانا معاك بس اذا دشيت بموضوع الحبوب بتاخذ وقت والحبوب تأجل المشكلة ماتنهيها انت اللي بيدك باصرارك واتكالك على الله راح تتخطى هالمرحلة
ولله الحمد هالكلام من 10 سنين تقريبا بدات تخف تدريجيا وواجهت النوبات بدون حبوب والحين الحمدالله عايش حياتي وفتحت مشروع وناجح بشغلي وبحياتي
واجهو المرض تحدوووه والله هي دائرة اذا قدرتو تكسرونها راح ترجعون للحياة الحلوه
استغفروا كثيييير ووالله ان من احد اسباب شفائي الاستغفار
الله يشافيكم يارب

تدري أنا زيك وفرحتني والله،انا زيك بالزبط كنت أشوف الدنيا سوداء ونوبات هلع وأخاف بس لما طولت شفت الموضوع مايستاهل وصرت ماهتم ولي 4 شهور
بس الحين صارت ترجع لي الاعراض ورجع فيني الخوف والثقل بالراس ودايم أفكر او في مشكلة بالقلب او ضغطي مرتفع
بسألك كنت تحس بشيء ب أذانك ضغط أو طنين؟ وأحيان فجأة تحس جسمك خفيف وأيام ثقيل.

نغزات طنين خوف ثقل بالراس وثقل الرجول والالام اليدين والرجول وتنميل الفك اليسار وغازات الالام بأماكن كثيرة نغزات الظهرهواء فالاذن وضغط فيها صداع بالعين الم بنص الراس ومؤخرة الراس ضيقة تنفس خفيفة او تحس فيها فصدرك وتروح مع الكحة خفقان أقل مجهود يجي احياناً

وهل كانت تصيرلك وأنت ماتفكر بالمرض يعني وأنت برا وانت بالمطبخ مع اهلك كذا.

ويييييه والله تذكرني بنفسي بالضبط تدري ليش كل هالاعراض تجيك لانه التفكير وشدة الاعصاب تخلي كل شوي يضرب مكان بالجسم تحس انه في مشكلة مثلا بالاذن احس فيها نبض نغزات بجميع الجسم من التوتر تنميل الجسم فجأة حار وفجأة يصير بارد انت تقول تخاف مشكلة لالقلب يا اخي انت اهون منى انا كنت امشي وايدي علي نبض رقبتي اشوف نبضات قلبي سريعة ولا بطيئة انا وصلت مرحله متعبه مع ان الطبيعي ان ضربات القلب تسرع وتبطئ بس وقتها تعال اقنعني بهالموضوع
عموما كل الاعراض اللي قلتها كانت عندي واكثر
نصيحتي لك
اياك والانطواء علي نفسك ولاتشتكي لاحد الا شخص او اثنين تثق فيهم ويعرفون مشكلتك كثرة الشكوى للناس يتعبك كل واحد يعطيك معلومات غلط وغير اللي يتفلسف اذا صارت لك نوبه استرخي علي السرير وراح تعدي بهدوء اذا فكرت بمرض قول خله يجييني وبروح اتعالج لاتخاف منه ولازم تكسر دائرة التفكير باي شي اطلع العب بتلفونك روح العب رياضة ممكن تقول هالشي ماراح يفيدني صدقني ان هالشي مهم بشكل ماتتخيله
واهم شي اهم شي اهم شي
الاستغفااار اكثر من الاستغفار

أهلاً بك أخي , ماشاء الله ولاحول ولاقوة إلا بالله ربنا يوفقك في رحلة شفاءك
موضوع في قلب الحقيقة ,رأيك يوفق رأيي
أدرك أنك أصبحت أكثر فهماً لحالتك وهذا هو مربط الفرس
النفس تحتاج صبر لكن الكثير يريدون الطريق الأسرع والأسهل ويكتشفون العكس
لايريد أحد ترويض نفسه وإعادتها للصواب فذلك يتطلب جهداً
بارك الله بك أخي , وربنا يوفقك لكل خير

ما شاء الله
الحمدلله على سلامتك
عقبالنا يارب♥
الله يشفي كل مبتلي

هههههههه الله يسعدك كنت زيك اقيس 24 ساعة بس خفت والحين لما رجعت الاعراض رجعت لحالتي, بس اهي تزيد معاك لما تطنش؟
الحين احس راسي الالام وقلبي رحت عند دكتور اقيس ضغطي طلع مزبوط الحمدلله
المشكلة عمري19 😢وخايف من الضغط
وخايف اتريض ادوخ ولا يصير شيء غصب عني افكر كذا 😢

اسال نفسك سؤال
انت خايف من الضغط
ولنفرض ان جاك مرض الضغط
وين المشكلة
ترى نص الشعب عندهم ضغط وسكر
اكسر دائرة التفكير اللي انت فيها كل ماتفكر وتخاف غير الموضوع
روح اخذ شور
العب لعبة بالتلفون
سو اي شي اي شي حتى لو تضل الفكرة موجوده مومهم بس لازم تشغل تفكيرك عن فكرة المرض

😍😍❤❤❤❤❤❤❤❤❤❤❤❤❤❤
اوكييي

نفس اللي وصفته بس انا بالجزء اليمين وتجي لما افكر فيها ايش حلها التجاهل ؟!

طبعا التجاهل لانه هذا مو شي مرضي هذا الاعصاب لما تشتد وتتوتر النغزات تشتغل بكل الجسم
ماتلاحظ ان ماتصير هالنغزات وانت مستانس ومرتاح
ماتجيك الا اذا توترت فقط
تجاهلها اكسر دائرة التفكير واشغل نفسك باي شي ثاني حتى لو تاخذ شور

الله يسعدك وربي كلامك يريح الله يتمم عليك العافية
فعلا نغزات والم اطنشه ويروح باذن الله ويجي لما افكر فيه او اتوتر 🥺
انت كيفك دحين وايش تفكيرك على الأيام اللي راحت تحس انك كنت تافه وأعطيتها اكبر من حقها؟!
نفسي يجي يوم اضحك على نفسي وأقول كيف كان تفكيري كده وأعم شي اساعد غيري يطلعو من اللي هم فيه 👌🏼

سلام أخوي, جربت أغير نفسيتي واختفى الخفقان والصداع وكذه بس قبل شوي
جربت أقوم من الكرسي بسرعة وقلت بلمس قلبي بيدي وأشوف, مادري تجيني ضربات كذه زي الخفقان تحس القلب ثقيل وبطئ ويضرب ضربة قوية عرفت
وجيت أقيس نبضات يدي بمعصم يدي أشوف في نبضات وشوي كذه بالنبضه ال10 او 8 الصوت يوقف ويرجع خفيف ويرجع عادي وكذا هل هذا طبيعي؟وجرب وقولي
ورجعت لي الاعراض لما فكرت مادري هل طبيعي تشوف؟؟

الله يتمم عليك الشفاء ويشافي جميع الاعضاء

الاعراض المذكوره من الاخوان بالموضوع كانكم تتكلمون عني احس فيها جميعها والله يعين
لازلت مقاوم للمرض واعراضه مره اطرحه ومره يطرحني هههههه الله المستعان
بس الدكتور يقولي نفس ماقالك دكتورك الدواء عامل مساعد لكن الاهم تصحيح السلوك والعلاج السلوكي النفسي

ورافض للان يعطيني اي دواء يقولي قاوم خوفك متى ماكسرنا حاجز الخوف قهرنا المرض ويقول الادويه ضروره لمرضى وغير ضروريه لمرضى اخرين

ماشي عالارشادات والله يعينا ويكتب لنا الشفاء ولكل الاخوه والاخوات الي يعانون مع هذا الابتلاء وان الله يكتبه لنا بميزان حسناتنا ويكفر فيه عن ذنوبنا

نصايحي
تفاؤل رغم التعب والالم
زيدو من قراء القران والائكار
مارسو الرياضه
اتبعوا حميه
اشغلو كل دقيقه فراغ بشي لاتقعد فاضي نهائي الفراغ وقود القلق
وابعدو عن تتبع الاعراض بقوقل لان بيعفس الشغل

واكثرو الدعاء

الإرهابيين نريد نجتمع في مقهى أو حديقة أقصد الشباب يمكن هذه خطوة في طريق العلاج