تجاربكم مع اختلال الآنية وتضارب الأفكار
 

السلام عليكم
احكولي عن تجاربكم مع اختلال الآنية وتضارب الأفكار تكفووووون خلونا نصبر بعض

لييييش ما تردون

مرحبا اختي والله ايش احكيلك كني عايشه في حلم كن الي حولي كله كذبه الشوارع غريبه الناس غريبه كني عايشه في عالم ثاني والافكار ايش احكي وايش اخلي كل لحظه جالسه يقولي استني الموت بيجيك بعد شوي 15 سنه وانا على هالحاله وزادت علي بعد وفاة امي وابوي زادت علي بانه يخليني اتخيل بموت بعد شوي يابنفس مرض امي يابنفس مرض ابوي
واعراض جسديه كل مازادت معي الافكار صارت لي كتمه شديده كني ماتنفس وكني اجبر نفسي على التنفس ورجفه ووحده واحساس بخوف شديد وكن شئ راح يصير لي او يصير ل اولادي يوميا كل لحظه كل ثانيه اقوم وانام وانا استنى حاجه بتحصل حتى وانا اطبخ والله العظيم يقول بسرعه اطبخي وخلصي الحين بتموتي وكل شوي اتجسس نبضي هل قلبي يدق اولا احيانا احس فيه واحيانا لا والكتمه زادت معي لانه يقولي كتمتك هالمره صدق مو كذب هالمره راح تموتي صدق لان قلبك راح يوقف وراح تصيبك جلطه وتتركي اولادك
والله اكتب لك وانا ارجف وحس ببروده وجالسه اتخيل وافكر ان بعد شوي بيصير لي شئ واني صرت في المستشفى وان الاسعاف شالوني تخيلات وافكار الله وكيلك لها الحين شهرين معي حتى الاكل والله كرهته يارب تعبت والله تعبت ومليت

الله يخفف علينا يارب والله شعور صعب جدااااا لايطاق

ممكن اعرف ايش الاعراض الي تصير معك؟

نفس حالتك كانك تحكي عني بس انا الحمد لله ماحس، باختلال انيه اكثر من القلق ونوبات الهلع والكتمة اه من الكتمة تعتبتني ماعدت اسوي شي منها حتى المشي البسيط يتعبني خوف من غير مبرر المشكلة ادري انها وساوس بس كل مره اقول لا هذي المره شكلها صدق يارب رحمتك بس طيب انتي ١٥ سنه ماجربتي تاخذي ادويه او تتعالجي انا من زمان لكن الان انا حامل وخايفه من الولاده وكل تفكيري اموت من الكتمة وانا اولد رحت لدكتورة عطتني بروزاك ٢٠مل لمدة شهر كل يوم حبه وصارلي كم يوم بس من اخذته يارب يكون سبب ويشفينا احمعين يارب طيب هل تجيك نوبات هلع ولا بس كتمة؟؟انا اول مره اخذ دوا نفسي مع اني من زمان اعاني عشان كذا خايفه شوي منه الله يستر

مرحبا اختي اي والله نوبات هلع تصيبني الحين يوميا كل لحظه كل ثانيه وهي بعد الي سببت لي الكتمه تخافين كان شئ بيحصل لك في لحظه وراح تموتي تظلي طول يومك خوف قلق ماتدري ايش كانك جالسه تستني حاجه موكويسه بتحصل لك او ل اولادك او ل احد يعزك عليك تصدقي حتى الاكل والله العظيم كرهني فيه يقولي اذا اكلتي راح تنكتمي وتموتي ف تجيني وانا اكل احيانا ابكي بكاء شديد
وزي ماقلتي كل مره يقولك هذي حقيقه مو وسواس وتجلسي في هالدوامه ويالله وتزيد الكتمه وكل شئ وتكرهين حتى نفسك
لا ماخذت ادويه ولافكرت لاني ف وقت ال15 سنه كانت تجيني على خفيف وتروح كانت حياتي مليانه وكنت اشغل وقتي امي ابوي زوجي فيه وفجاءه.......توفى ابوي صارت الاعراض والوسواس يروح ويجي وكانت امي وزوجي فيه وكنت مشغوله معاهم وبوجودهم بعد وفاة ابوي بفتره تطلقت من الشخص الي حبيته وماتخيلت ف يوم انه راح يبيعني وكانت امي موجوده وكنت اسولف معاها اضحك معها انسى همومي شوي وقبل 10 شهور ليلة رمضان توفت امي وبعدها خلاص فجاءه صرت وحيده فعلا فعلا واولادي صغار وصارت الحين ملازمتني الكتمه نوبات الهلع بشكل اقوى والقلق زاد معي بعد بشكل اقوى من الاول والله العظيم ايش احكي لك بس ماعاد عشت حياتي طبيعيه قلق كل ثانيه فجاءه صرت وحيده بعد ماكنت اسعد انسانه

ي ألله الله يرحَمهم يارب ويعوضك خير انا نفسك بالضبط والله جد احس انا الي اكتب مو انتي باستثناء بعض الضروف انا من كنت صغيرة فيني نوبات هلع ووسواس الموت بس تعودت عليه وماكان يأثر على حياتي لاني كنت مشغوله ومو مركزة فيها كثير لكن اعتقد ان كل مازادت الضغوطات كل ماكانت الحالة اصعب وكل ماكانت الظروف اقوى تزيد اكثر واكثر الله يفرج همك وهمي يارب هو المشكلة الاستسلام لها من البدايه اكبر خطاء لان التراكمات فجأه تطلع مع اي ضرف يصير يعني احنا معرضين اساساً لهذي الامور تركناها وتجاهلناها كل هذي السنوات لين جاء الوقت الي خلاص ماعاد فينا طاقة نتحمل شي طيب لازم تلقين لك حل لان بكذا بتزيد حالتك اكثر واكثر انا بالنهاية استسلمت ورحت طبيب نفسي ووصفلي هذا البروزاك على امل يخفف لاني ماصرت حتى اطلع من البيت تزييييد الكتمة والخنقه ومع الناس مقدر اجلس معاهم احس مكتومة وحتى وانا اكل وانا اصلي بكل وقت واول ماصحى من النوم كل تفكيري بالكتمة والخوف ملازمني بكل مكان يارب رحمتك والله شي متعب جداً الله يلطف بحالنا ويشفينا يارب

اللهم امين الله يجزاك خير
اي والله حتى انا كرهت الخروج من البيت والناس والجلسه معهم لانها تزيد علي الكتمه وتبدا الافكار والتخيلات معي واني بطيح بينهم وراح يغمى وبشيلوني ويودوني للمستشفى ف تزيد معي الاعراض لما اتخيل
واسترسل مع الفكره
والله ودي اليوم قبل بكره القى حل لاني تعبت كثير ومليت وزي ماقلتي تصحين من النوم وانتي على قلق وكتمه وخوف ملازمك كانهم اصدقاءك والله ماعاد ادري ايش اسوي

حاولي انك ماتجلسي كثير لوحدك الفراغ هو الي يدمر النفسيه سويلك جدول كل يوم حاولي انك تسوين شغله تحبينها ولاتفكرين كثير بالموضوع لانه يزيد مع التركيز واذا في امكانية انك تزورين طبيب نفسي وتشرحين له حالتك احسن وقدامك العافية

اعراضي هي عدم تحمل الضوء دوووخة ارى كل شيء بعييييد عني كل شيء كأنو موحقيقة اسأل نفسي هل أنا موجودة أم لا أشك في كل شيء لاحول ولا قوة الا بالله مرات يخف الشعور مرااات يرجع بقوة وسواس في كل شيء خاصة وسواس العقيدة استغفر الله وأتوب اليه هل يأتيك وسواس في العقيدة أنت كذلك ؟؟؟؟ولا أنا بس يالله تعبت لا تنسوني من صالح دعائكم

نعم وانا زيك ماحب الضوء نهائي وكني مو حقيقه هذا غير الاعراض الجسديه
وسواس العقيده لا الحمدالله ماوسوست فيه بس لما تزيد الحاله معي ماعاد احب اسمع صوت الاذان او قران او شئ
الله يشفينا يارب

فليوكستين هو بروزاك صح 😭صارلي اسبوع بالضبط بس ماحس بشي لافادني ولا نفعني نفس حالتي بس خفف شوووي من الكتمة مو كثير

اثناء النوبه والكتمه والاختناق من منكم يلح عليها الوسواس تروح للمستشفى على انها خلاص النهايه واذا حاولتي تتجاهلي الصوت الي داخلك يجلس يصور لك المستشفى عشان تتضايقين اكثر وتزيد معك الاعراض اكثر

الله يسعدكم جاوبوني😣

انا 😪بس خلاص من كثر مارحت للمستشفى حفظوني الطوارئ كل مره يسوون تخطيط ويقيسون العلامات الحيويه كل شي تمام بعدين اقتنعت ان روحتي للمستشفئ مامنها فايده رضيت بالامر الواقع وصرت اتحملها لين تعدي 😑اكره شي اذا جاتني النوبة وانا بالسياره يالطيف شعور مقدر اوصفه عشان كذا كرهت اطلع لا اي مكان واذا طلعت اظل على اعصابي ومتوترة بس انتظر ارجع للبيت الله يعين على ذا الحاله مدري متى بتنتهي احس اني مو عايشه مع العالم

فعلا اختي اقسم بالله كنك تتكلمي عني في السياره اسواء شعور وفي نفس المكان الي انتي رايحه له بعد اظل على اعصابي ابغى ارجع للبيت وكرهت والله الخروج ل اي مكان بسببها فعلا كنك لحالك في هالدنيا ماتعرفي كيف تتصرفي والله تعبنا

الحمد لله على كل حال والله اني اذا طلعت اشيل هم الناس، تنبسط وانا متوتره وكأن بيصرلي شي الله يشفينا يارب ماشية على العلاج وانتطر ان شاء الله اتحسن لو تحسن بسيط الكتمة تعبتني 😥مدري هي كتمة صدقيه ولا بس انا اتوهم

صباح الخير اختي....
اي والله غير كذا تشيلي هم نفسك انتي بعد لايصير لك شئ قدامهم تتجلسي تتخيلي انك طحتي بينهم وان كلهم جلسوا يصارخوا ويبكو عليك وتتعمقي في الافكار....
انا كذا يجيني صوت داخلي كل مره ترى شوي وبطيحي بينهم وبتموتي واجلس اتخيل اني طحت وانهم يصارخوا علي والمشكله كل مره يقولي كذا وماحصلي الحمدالله شئ عشان كذا كرهت الخروج
والله وانا زيك اقول هل الكتمه وكني ماتنفس صدق والاانا اتوهم ياليت الاخوان في المنتدى يساعدونا

السلام عليكم كيف الحال اختي حبيت احكيلك تجربتي مع ضيق التنفس وإلمامك الشديدة عانيت منها زيك ما أتحرك من مكاني ماآكل نهائي كل مرة يودوني المستشفى أخذ أكسجين بلا فايدة شهر رمضان كله وأنا على هذا الحال كل الفحوصات سليمة دقات قلبي فوق 120 بطني أحسه متحجر بعد كل هاذ المعاناة قررت اروح لطبيب نفسي شخص حالتي انها نوبات هلع أخذت الدواء لجرعات صغيرة مره ارتحت رجعت لحالتي الطبيعية صرت أتحرك سافرت ذهبت عني كل الوساوس خففت الجرعة بعد شهرين صرت آخذ حبة في اليومين الحمد لله ما حصلي شيء رجعت للطبيب بعد أربعة اشهر خفف لي الدواء صرت آخذ حبة كل ثلاث ايام بعد أسبوع زارني الضيف الغثيث يالله بعد مانسيت كل هالمعاناة رجعت لي من جديد وأكثر بعد حسيت هاذي المرة موبس نوبات هلع زادني الوسواس واختلال الآنية مع اكتئاب المرات لي فاتت كنت أقاوم شوي كنت متفائلة لكن الحين أعاني من اكتئاب شديد كل شيء اعملو غصبا عني مو قادرة أعيش أصبحت مترددة في اتخاذ اي قرار يالله يصبرنا بس
بالنسبة لي اخذوا أدوية هل هاذي أعراض انسحابية بس ولا رجعلي المرض من جديد وفي احد صارلو نفس الشئ ؟؟؟ ارجو الإجابة لا تنسوني من دعاءكم

الله يشفينا يارب يمكن هذي الاعراض الانسحابيه اصبري شوي ان شاء الله تروح وش الدوا الي كنتي تستعمليه لنوبات الهلع انا الدكتورة وصفتلي بروزاك وهي معاي من سبع شهور نفسك والله الحين ما اكل ماتحرك اذا جاتني نوبة الهلع من الكتمة حتى الكلام مقدر اتكلم المشكله انا متزوجة وعندي اطفال صغار بحاجتي واهملت بيتي كل ماتحركت زادت الكتمة ومعها نوبات هلع 😭😭اتحمل اي شي اكتئاب وسواس بس نوبات الهلع جد تدمر احس اني اموت باليوم الف مره

الدواء لي استعمله انافرانيل 10 مغ مع اميتريبتيلين 4 قطرات في اليوم ان شاء الله تكون أعراض انسحابية بس والله كل الأمراض النفسية متعبة جربتها كلها جحيم الله يرفع عنا البلاء أنا مو متزوجة لساتني صغيرة بالعمر بس هاذ المرض ماترك لا صغير ولا كبير والمشكلة ميحس فيك الا لي مجرب كل الناس تشوفك تدلعي وشخصيتك ضعيفة ومدري إيش الله يشفينا يارب ونفتك من ذا المرض اميييين

مرحبا
انا يروح يوم ويرجع لي ايام بشكل اقوى او بوسواس جديد بس انا مارحت طبيب نفسي ولاخذيت بس ماشفيت منه عشان كذا ماعرف هل هي اعراض انسحابيه عندك او لانك خففتي الجرعات رجع لك اقوى
وزي ماقلتي انا بعد بطني يتحجر بقوه والمعده بشكل اقوى وكني ماتنفس اقول كيف نتنفس كيف الناس يتنفسوا يمكن بعد شوي ينقطع النفس عندي واجلس اراقب تنفسي كني ماتنفس صدق احس ماتنفس ضيق صدري هالوسواس كرهني حياتي كل لحظه اعيش قلق وخوف وبس انتي زيي تحسي كنك ماتتنفسي؟؟؟؟؟
الله يشفينا يارب

نعم كنت أعاني من ضيق تنفس شديد لكن الان الحمد لله خف بعد شرب الدواء الان الوسواس والاكتئاب لاعب فيني لعب الله يخفف علينا يارب

اللهم امين طيب كنتي تحسي بنغزات في القلب زي الكهرب وتحسي كان بيوقف ف اي لحظه

اللهم امين يارب

كانها انا بالضبط هذا الي احس فيه ووقت النوبه احاول اخذ نفس واحس شي ثقيل على صدري مقدر

يمكن هذي الاعراض الانسحابيه للدوا بدا ينسحب من جسمك طبيعي اصبري اسبوعين اذا ماتحسنتي ارجعي للدكتور اشرحيله الي صاير معك

يا الله كأنك تتكلمين عني وربي انا صرت احس اعراض من قوتها اشك واوسوس انها لا سمح الله شي عضوي لدرجة احيان فجأه احس للحظه كأني من غير شر فقدت الوعيي ورجعت مدري شعور غريب مو عارفه شلون اوصله وطبعا مع الخوف الخفقان يبدا والافكار ووسوسه بالامراض
اما بالنسبه للشوارع يووووه اذا طلعت اجلس على اعصابي الشوارع غريبه السيارات غريبه الناس غريبه حتى اللوحات والاشارات غريبه مو مستوعبه احنا وين ووين رايحين وليش رايحين والحمدلله على كل حال...