نفساني - عرض مشاركة واحدة

13-07-2015, 01:34 AM

السلام عليكم

بقولكم كيف بدا معاي

قبل سنه ونص تقريبا
امي وابوي كانو مسافرين وانا في البيت كنت نايمه فجاه صحيت احس خلاص بموووت روحي بتتطلع
قعدت ارجف قمت صليت ركعتين وانا شبه منهاره ودقيت على امي وقعدت اصيييح اقول بموت بموت

المهم بعدها جلست اقرا الاذكار والهي نفسي لما طلع الصباح بعدها نمت
اليوم الي بعده قاعده على اعصابي مدري وش فيني
بعدها خف وكل يوم يخف كان مافيني شي بعدها لما قربنا من الصيف زااااااد وجهي ذبل وطول الوقت مافيني حيل خلاص تعبانه
وامي وابوي يحاكوني وانا مو مقتنعه بحكيهم ابدا
قبل رمضان اللي فات كنت اقول وين انا اصلا ماراح احضر رمضان
ولما دخل رمضان قلت ماراح اكمله ووو من هذي الوساوس الي كلكم تعرفونها

بعد رمضان فتره تعبت فيها مره كانت صعبه علي جدا جدا كنت ماانام الا ساعتين واصحى من الروعه واصيح ليل ونهار
وجتني اول نوبه هلع يالله ماكنت عارفه وش هذي
المهم وعدت على خير الحمدلله
حتى جدولي الجامعه ماكنت مصلحته على اساس اني ماراح احضر هههه استغفرالله
مع الدراسه يخف ويرجع يخف ويرجع يعني ماصرت اصيح طول الوقت ولا تعبانه مره بس الضيقه موجوده

بعدها مره خف بس الحين رجع وبقوه
انا تعبت اقنع نفسي انها وسواوس وانها مو صدق بس لما اشوف احد توفى ارجع زيي قبل

يقولون لي اطلعي والهي نفسك واطلع والهي نفسي بس الا مايجي ايام اجلس في البيت وخاصه اني البنت الوحيده فما يكون معاي احد يلهيني

كذا جواتي شي مااحد قادر يفهمه امي وابوي يحاكوني ويفهموني بس هم مو فاهميني انا وش احس ووش افكر مو بيدي هذا غصب علي احس كذا ضييييقه
المهم رمضان هذا يجيني يوم ويروح يوم ومن هالحكي

بس قبل شوي قريت عن واحد توفى الله يرحمه صغير فجاه يعني وكان حاط بتويتر ايه عن الموت وكذا عاد انا خلقه اصيح على كل شي وحساسه فقعدت اصيح عند امي وامي تهزءني تقول بتضيعين حياتك وشوفي الناس ماحد يدري اذا هو بيكون موجود بكرا او لا بس شوفي كيف يطلعون ويجهزون للعيد والسفر ومتوكلين على ربهم
انا عارفه ان كلامها صح بس موووو بيديي يجيني غصب كذا احس ودي اصرخ من كثر التفكير
تعبت مره مدري وش اسوي بنفسي بس افكر كيف مات كيف كان خايف كان يفكر زيي ولا لا والقبر واهله وكذا

انا عارفه ان الاعمار بيد الله وهذا بعلم الغيب بس ماادري هل الي يموت يحس انه بيموت
انتو كذا زيي او لا؟؟ تحسون زيي؟؟؟؟
لما احد يتكلم عن الموت او عن شي غيبي تحسون كذا انه يقصدكم او كذا تحسون تركزون في كل كلمه
ووقت النوم تخافون منه؟
ابي اتطمن انها وساوس
يظنكم اروح دكتور احسن؟ انا فكرت اروح بس شفت كثير كتبو اعراض جانبيه من الادويه انها زادت الضيقه ونوبه الهلع وانا حمدلله ماجتني الا مره وحده ومابي اجربها ثانيه

الله يعافيكم ابي احد يقولي ان في ناس تتشافى وتعيش طبيعي وخلاص يروح منها وانه اصلا بس وسواس ومو صدق هذا الي نعيشه

الله يشفيني واياكم وجميع المسلمين ويجعلنا ممن طال عمره وحسن عمله يارب

المصدر: نفساني