نفساني - عرض مشاركة واحدة

23-05-2016, 10:55 PM

نقعد مع ناس سواء اقارب او صديقات او حتى عابرين

ونسمع شكواهم المختلفه..

مثل اعراض صحيه او مشاكل عائليه وغيرها

ويختلف التفاعل حسب كمية الوعي وكمثال :

وحده تقول سكنت بيت جديد وحسيت بضيق واني كارهته..

الردود ممكن تكون:
لاتكون عين..
لايكون سحر ..

لكن نااادرا ماتلقين وحده ترد وتقول انه شعور طبيعي تحسين به لمجرد الانتقال لبيت جديد وانها فتره وبتعدي..

بعض الناس يتأثرون بأي كلمه منك تقلب حياتها وكيانها ومتاهة..
مثل السحر والعين تخليها تحوس على الرقاة وتتعب اكثر..

لكن الكلمه الحلوه اذا هونتيها عليها بتخليها ترتاح وممكن بنفس اللحظه تتحسن وتترك هالتفكير السيء..

البعض عندهم قدرة عجيبه على تعكير مزاجك وتوقع الأسوأ..
ومجلسهم كله قصص عن الخيانات الزوجيه والسحر والخادمات المجرمات واعراض الأمراض والجرائم وحوادث السطو والخذلان..

نصيحه اذا شكت لك وحده من هم وعجزتي تخففين عنها لاتزيدين همها..
اسكتي افضل حتى لو نيتك زينه ودوافعك حرص ومحبه..

قبل 6 سنوات شفت وحده مره نحييييفه ويوم سلمت عليها قلت لها يختي ليه مختفيه البنت تغيرت ملامحها وطول الجلسه كانت متململه..
يوم رجعت البيت راجعت نفسي وكلمتها واعتذرت منها وقالت اني اعاني من نحافه مرضيه وفقدان شهيه حاد..

وانا كانت نيتي زينه وتعليقي كنت متوقعه انها متعمده تنحف بهالشكل..
وكان هالموقف دررررس لي لو دخلت الف دورة تطوير ذات ماتعلمت منها..

وعرفت انه من سوء الأدب نقول لأحد وراك ناحفه او سامنه..
الا اذا كان التعليق جميل مثل: ماشاء الله ناحفه ومحلوه او سامنه ومحلوه..

هالمشهد يتكرر مع امهات عندهم اطفال نحاف..
ليه ولدك نحيف وليه بنتك نحيفة ليه لونهم اصفر شاحبين..
تقولينه مجتهده لكنك تنكدين عليها..

الشواهد كثيره ( بيتكم صغير ، اثاثكم قديم ، شغالتكم بارده ، سواقكم عله ، لبسك مو كشخه ، مكياجك مو مناسب )
ماودي اطول اكثر..

ليكن حظ المؤمن منك ثلاثة ؛ إن لم تنفعه فلا تضره وإن لم تفرحه فلا تغمه وإن لم تمدحه فلا تذمه..

ربنااا لا تجعلنا سببا في ضيقِ احدٍ من إخواننا المسلمين
ربنا اعفو عنّا واغفر لنا وارحمنا انك عفوٌ غفور رحيم 🌹

المصدر: نفساني