|
وش رايكم بهذي المشكله ؟؟ ساعدوني
السلام عليكم ورحمة الله وبركاته ..
أنا عضوة جديده معاكم بالمنتدى .. وما سجلت فيه الا بعدما اعجبني مضمونه والاسلوب الراقي فيه ...
أتمنى تقبلوني بينكم وتساعدوني في ايجاد حل لمشكلتي ..
انا فتاة.. مرحه .. احب الضحك والسواليف..اجتماعيه .. الخ . فهمتوا الصوره العامه ..
تزوجت حديثا .. ودخلت عش الزوجيه .. واكتشفت ان زوجي.. شخصيته غير..هو انسان مرح وهادئ وطيب وقلبه أبيض..
لكن دايم مكتئب..دايم ضايق صدره.. دايم سرحان ..وانا دايم احاول ما اضغط عليه واحاول اني اوسع صدره بأي طريقه..
مشكلته يشيل هم اتفه الاسباب ..وما يشوف الا الجوانب السيئه من الامور..يعني مثلا ذاك اليوم لقيته زعلان.. قلت وشفيك ؟ قال انا طول عمري اتمنى انسانه روعه مثلك.. وبالنهايه يوم تزوجتك .. ما عرفت ارضيك.. (والله حاله) اقول له طيب خلاص المهم اننا صرنا لبعض.. وهذا احلى شي.. بس هو تفكيره شي وانا تفكيري شي..
دايم يتكلم سلبيا عن نفسه.. واحس انه يكره نفسه.. ويقول كلام كثير مقتنع فيه لكن ابين له انه مو صحيح.. بس ما يقتنع.. هو انسان رائع.. بس احس انه قاسي على نفسه .. كلامه مثل ( انا مالي هدف بالحياة .. انا افه على المجتمع ..انا ما استاهلك .. انا مو سنع .. انا انطوائي .. انا ما عندي ثقه بنفسي ..انا مالي اي دور.. انا فاشل .. <-- دايم يقولها )
طبعا انا احاول اقنعه وابين له مميزاته وحاولت كل شي وبكل طريقه ممكنه ..
واحيانا فعلا ينبسط .. لكن ما تمر ساعتين الا يرجع لوضعه الاصلي ..
طبعا هو يرجع كل هذي الاشياء .. لعلاقته مع والده .. يعني كل هذا تأنيب ضمير لأن علاقته مع والده ما كانت كويسه .. يعني كانت رسميات وبرود وجمود..نصحته انه يحسن اوضاعه مع والده علشان ينتهي الموضوع. لكن يقول انا تعودت من يوم وانا صغير وما اقدر اغير شي الحين .. يعني بالعربي ما في امل ..
انا بصراحه مليت من وضعي معاه .. هو دايم زعلان وانا دايم شايله همه وما احب اشوفه كذا ..
تعبت وانا اشيل همه .. وتعبت وانا احس اني دايم بلحالي. ما كأني متزوجه ..ودي انه يتغير وينبسط ..
وعلى فكره.. زوجي انسان مستحيل يتخذ الخطوه الاولى .. يعني مثلا الحين انا رجعت لبيت اهلي زعلانه .. وانا عارفه انه مستحيل بيراضيني بأنه يتغير ويكون انسان ايجابي.. لكن بالنهايه شكلي بأكلمه ونتناقش جديا بالموضوع والحلول لهذي المشكله.. بعد ما اسمع رأيكم ونصيحتكم لي.. وجزاكم الله ألف خير ..
فأرجوكم ساعدوني لأني خجلانه من نفسي اني توني متزوجه وتصير لي هالمشكله ..
اختكم الجديده .. الفراشه
|