|
احتاج مساعدتكم بالتخلص من وسواس الخوف من الامراض
السلام عليكم ورحمة الله
بالبداية بعرف عن شخصيتي من قبل الزواج كنت انسانه مرحه جدا ولاقد مريت بمرحله نفسية ولله الحمد كانت حياتي مليانه بوجود اهلي وخواتي جو بيتنا كان جو مايسمح للواحد يجلس بوحدة وعزلة من كثر ماكنا كلنا مع بعض امي وخواتي واخواني
بعد ماتزوجت سكنت بعيد عن اهلي تغيرت شخصيتي تماما اجلس بالبيت كثير بين اربع جدران افتقدت للسوالف والجمعة الحلوه زوجي مشغول باعماله ٢٤ساعة نادرا مايكون عنده وقت فراغ
انجبت طفلين بدت عندي مشكلة الخوف من المرض بعد ولدي الثاني جتني اعراض دوخه وعدم اتزان واكتئاب وضيقة صدر واهملت نفسي وبيتي وكل شي وبديت اقرا بالنت عن اعراضي دخلت بدوامة من الامراض الخطيرة اللي قريتها وخلاص مسكت علی مرض معين علی اساس هالاعراض فيني خلاص هذا مرضي تعبت نفسيا من التفكير بهالمرض وصار شغلي الشاغل اقرا عنه بكل مكان لدرجة اتصفح مجلة والا جريدة بالصدفة اشوف يتكلمون عن هالمرض اتابع قناة معينه بالصدفة يجي برنامج موضوع حلقته عن هالمرض صار يجيني بكل مكان وكانه يقولي ترا انا اللي فيك خفت رحت لطبيب عام وبعد الكشف صار عندي التهاب بالجيوب الانفية وقالي انه الدوخة وعدم الاتزان والضيقة منها جلست فترة سنة تقريبا على بال ماطلعت من الحالة اللي انا فيها بمساعدة اهلي والقراية والمشي وامور كثيرة وعدت نفسي بعد ماتشافيت اني مارجع اقراء عن اي عرض يجني بقوقل لاني عرفت انه السبب الاساسي اللي دخلني بدوامة الخوف
بس للاسف قبل اسبوع بالضبط جتني اعراض بجسمي وجلست اقرا عنها ونفس الشي طلع شي خطير ومسك معي خلاص انه هذا اللي فيني ولعب فيني ابليس ودخلني بمرحلة الخوف والضيقة والكسل وبس انحاش من التفكير بالنوم اهملت كل شي بالرغم من اني رحت للطبيبة وصار التهاب بسيط وعالجته لكن الخوف مستمر الضيقة مستمره اصيح علی اتفه شي قلة شهيتي للاكل صار معي اسهال قل شربي للماء بس انتظر الليل عشان انام ولاافكر صرت الوم نفسي عشاني دخلت لقوقل وقريت عن هالاعراض حسيتني غبية لاني رجعت لشي وعدت نفسي مارجعله الحين بس ابي ارجع مثل قبل ابي نفسيتي تكون زينة اترك الخوف وابعد عني هالضيقة وشلون اساعد نفسي تكفون لاني مابي اطول بهالشي مثل المره الاول مابي اجلس سنه بعزله واهمال لنفسي وخوف وتوتر من مر بتجربتي وتخطاها نهائي يساعدني
|