نفساني - عرض مشاركة واحدة

18-08-2018, 10:29 PM

اقتباس:

المشاركة الأصلية كتبت بواسطة * لـولـيـتـا *

ابونجلاء العلاج الطبيعي بتتحسن معاه مره
امي كان فيها غضروف ماتحسن الا بالعلاج الطبيعي
بعدين ايش فيها اذا سويت تمارين
مانت شايف شيبان الغرب كيف كانهم شباب ماشاء الله هذا كله
لانهم متعودين على الرياضه كل يوم

هلا لولو لا هنتي يالغاليه

هي ما هي بحكاية تمارين بقدر ما يكون خمول و تطنيش و إهمال
عقلي يقول كذا وش أسوي به و هذي طبيعتي بفعل سوايا الإكتئاب و القلق الله يكفيك شرهم

دامني أمشي الحمدلله

صحيح أحس بآلام خصوصا عند الثني و عند التيبس بس دامني أثنيها للآخر هذي نعمة و ما ثنيتها إلا بعد علة الروح و متمسك بالصبر و بعيش اللحظة بدون التفكير بالماضي و المستقبل و تستمر الحياة على قولة غيمة فرح رغم الآلام و الحمدلله على كل حال

اقتباس:

المشاركة الأصلية كتبت بواسطة قطرات الندا

يالله حي ابو نجلا وطلعت من الشر الحمدلله ان الركبه تحسنت وان شاء الله من زود لزود .
يووووه يابو نجلا اتذكرك قبل رمضان كيف وضعك متأزم من ركبتك شفت كيف ربي كريم ؟ وشفت كيف كلام امي صح ؟ العافيه شوي شوي انت بس تفائل وبيجي من الله مايسر خاطرك بحوله وقوته .
يشهد الله اني سعيده عشانك بطريق التعافي والأمل .
ودي اتهاوش معك ياخي ليش ماودك تسوي تمرين لعضلة الفخذ ؟ انت تدري ان تمرين الثاي اللي هو العضله الكبيره بالفخذ غير انه يشدها ويقويها هي اصلا تكون ضامره ومرتخيه والتمرين يبعث فيها الحياه والدوره الدمويه ؟ ماني افهم منك بهالشي بس بقولك عن شي ولد اختي تخيل نفسه طرزان يومه صغير وربط ثوبه على رقبته وطلع فوق الشجره يبي يطير وينط الا هو على وجهه وذراعه وينكسر الذراع من النص وسووله عمليه واسياخ وبعد فتره جبر العظم ومرت سنين وكبر الولد ويجي يسوي نفسه شمشون الجبار ويطلع فوق سور البيت ومعاه شاهي يبي يتقهوى فوق السور ويتكي على لمبة السور اثرها مرتخيه ويدبج على الرصيف على نفس اليد اللي انكسرت ويسوون له عمليه ثانيه وثالثه وتحسن شوي ومرت السنين وتخرج من الثانوي وسافر يدرس في بريطانيا وكل مابرد الجو تصول عليه يده ومايقدر يحركها راحت له امه وقالت لازم مستشفى قال الدكتور لاعمليه ولا شي اليد بعد الكسر ضمرت فيها العضلات وصارت ضعيفه ماتتحمل البرد ولا المجهود وسووله برنامج تمارين وعلاج طبيعي كم شهر والحمدلله الحين كنه حصان .
يوووه كتبت كثير كل قصة حياة العايله هههههههه
المهم وانا اختك احرص على التمارين ترى بتزين الحياه اذا صرت تطامر .
ابيك بس تتذكر اليأس اللي كنت فيه ووين كنت ووين صرت صح ؟
يأسك كان مؤلم لكن الحين الراحه مبينه على مواضيعك الحمدلله .
الله يكتب لك في الايام المباركه السعاده والعافيه وراحة البال ويغير حالك الى اجمل حال انه ولي ذلك والقادر عليه ويشفي كل مريض ويشرح صدر كل مهموم يارب

الله يحييك يالغالية و الله إن لك وحشة إشقد يا قطرات الندا

أفرح إذا شفتك و شفت مشاركاتك أحس إنك تفهميني صح

و أحس إنك كثير تطرقين باب قانون الجذب و الإيحاء و هذولي بابين مهمين كثير كثير صراحة قانون الجذب و الإيحاء يعملون عمل السحر في الأرواح

إي الحمدلله تعدل مزاجي كثير بس تصدقين ما أبي أحطمك أول ما خذيت البرنتلكس كنت أحس بنشوة و تفاؤل كبير و تطنيش رهيب للآلام أحس هذا الشعور نزل شوي ما أقولك راح لا الحمدلله ما راح بس نزل شوي و إللي زعلني إن مستشفى الأمل ما عندهم برنتلكس و يمكن نزول المزاج عما كان في بدايته سببه تقليل الجرعة فصرت آخذ منه 20 ملغ بس 10 لما أصحى من النوم و 10 منتصف اليوم بعد ما كنت آخذ 40 ملغ كلها من شان سعره غالي علي و أنا باليالله دراهمي تكفي من التأهيل الشامل و السعوده و حساب المواطن

ههههههههههه و الله عقدتي يا قطرات الندا هي التطنيش ما أدري يمكن عشان ما أحب نفسي كثير لأني عايش على التحطيم كفاك الله شر التحطيم يا هو عذاب

ههههههههههه شكل ولد أختك كان يحب المغامرات مثلي و الله يعين ع البرد عز الله بآكلها خابور تصدقين تمنيت الكسر في يدي مو في رجلي ههههههههههه أعوذ بالله من شرور الكسور كلها و من جهد البلاء و زوال نعمته و تحول عافيته و فجأة نقمته و جميع سخطه

اللهم آمين و إياك و إيا كل روح مسلمة يجيب دعواتك يالغاليه

اقتباس:

المشاركة الأصلية كتبت بواسطة غيـمة فرح

ابو نجلاء كلنا لك ذيك الاخت
وندعي لك دايما
تغذى بروتين وكالسيوم عشان العظم
وبترجع احسن من اول
ماتشوف الغابه كيف تجدد نفسها بعد الحريق
والاشجار تورق من جديد بعد الزوابع والامطار
وكذلك كل شي فيك راح يلتئم افضل من اول

هلا هديل يالله حي طلتك الحلوة

أنشهد بس يالغاليه الغابة تجدد نفسها لأنها ماهي من دم و عظم و لحم و عقل و قلب شفتي لو قصيتي غصن شجرة راح يطلع بدال الغصن أغصان بدالها و بإذن الله كلنا ذاك الغصن :)

الحمدلله مداوم ع الكالسيوم و الفيتامينات و إن شاء الله خير

اقتباس:

المشاركة الأصلية كتبت بواسطة محمد البدراني

هلاااااااااااااااااااا وغلاااااااااااا

ملاااامح اخبااااااااارك وين ايااااااامك يا بطل وش مسوى بالدنيا

بشرني عن حااااالك واحوالك

=================================================

هلااااااااا وغلااااااااااا عاااااااااااااااااالى ارحب الحمدالله على سلامتك سلامة كراعينك ومفاصلك لبى قلبك

-----------------------------------------------------------------------------------------------------------

هلااااااا لولو ارحبي كيفك وكيف امورك مع الاضاحي نااااوي تضحون او لا

-----------------------------------------------------------------------------

جمعتك طيبة ظلول وش الصورة هذي تسرقين من مسابيحي وتحطونها صور رمزية ههههه بلاش حركات علي بابا

تسلم حبيبي محمد لا هنت و سلامتك من كل شر

اقتباس:

ظلول وش الصورة هذي تسرقين من مسابيحي وتحطونها صور رمزية ههههه بلاش حركات علي بابا

هههههههههه يا بطني نقرتين لعرض الصورة في صفحة مستقلة

كل عام و أنتم بخير جميعا حاضرين و مشاهدين و غايبين

الله يشفيكم و يقويكم و ينصركم و يسعدكم

اللهم آمين

اللهم نسألك يا الكريم الحليم العظيم من الخير كله عاجله و آجله ما علمنا منه و ما لم نعلم و نعوذوا بك من الشر كله عاجله و آجله ما علمنا منه و ما لم نعلم
اللهم نسألك يالكريم الحليم العظيم من خير ما سألك منه عبدك و رسولك و نبيك محمد صلى الله عليه و سلم و عبادك الصالحين و نعوذوا بك من شر ما إستعاذك منه عبدك و رسول و نبيك محمد صلى الله عليه و سلم و عبادك الصالحين
و نسألك اللهم يالكريم الحليم العظيم الجنة و ما قرب إليها من قول و عمل و نعوذوا بك من النار و ما قرب إليها من قول و عمل
و نسألك اللهم يالكريم الحليم العظيم أن تجعل كل قضاء قضيته و تقضيه لنا خيرا