نفساني - عرض مشاركة واحدة - :-[ هطول الثلج على وهج النيران ]-:

02-05-2019, 11:32 PM

و الله ما أدري وين أوجّه و وين أروح
الكون ضِيقٍ من الجهات الأربعة 4 × 4

الله من هم يزوح القلب زوح ××
قَطّع شراييني عسى الله يقطعه

يا هند شوفي بارق الفرقى يلوح
سحبه تزود و بارقه له شعشعه

يا هند وجه القطع شوفيه بوضوح
واضح و لا يحتاج يشّر بإصبعه

أحبابي اللي بين قلب و بين روح
أقفوا و خلوني بوسط المعمعه

الصدر يا هند كما المرجل يفوح
و العين يا هند لهيبه تدمعه

يا كثر صدقان السوالف و المزوح
و يا قل صدقان الظروف الموجعه

يا هند و الله ما بقى عندي طموح
و لا للدواء بأمراض جسمي منفعة

ياليتها ضيقة تجي يوم و تروح
يا ليتها ضيقة توديني سعة

إقبال لأحزاني . و لأفراحي نزوح
هم يباشرني و الآخر يتبعه

لك بح صوتي يالمسيكين الشفوح
لكن و لا كنك كلامي تسمعه

و الله لو تبني على البيدا صروح
ما يكتبه لي خالقي : ما تمنعه

لو مر بك رجال يغليك و نصوح
علمك إن الماء يرد لمنقعه

و إن البن آدم لو يعيش بعمر نوح
يا قرب ساعة مولده من مصرعه

يا هند يا بلسم همومي و الجروح
أبوك ما يشكي وجع و أنتي معه

يا هند باقي بيت ، من عقبه بروح
أبعثر الشعر الحقيقي و أجمعه

https://