المشاركة الأصلية كتبت بواسطة للغايب عذر

السلام عليكم

الموقف اللي قلت بقولكم عنه هو التالي

انا من صغري عندي لتغة او لثغة او لدغة ( صارت لدغة ثعبان هههههه ) في حرف الراء

وانا صغير ماكنت ادري ان هالامر عندي وكنت منطلق في الكلام وعلى نياتي احسب كل شي تمام ههههه

لما بدأت بعض الناس تقلدني وتستهزئ بطريقة كلامي .. بعدها اكتشفت انه عندي اللتغة هههههه

المشكلة انه السخرية جت من عدة اشخاص وفي مواقف متعددة

الشي هذا دمرني حرفيا .. ماهو مبالغة لا فعلا دمر شخصيتي وثقتي بنفسي

طبعا الشي هذا جا مع الوقت ماهو من اول مرة جا واحد وقلد نطقي لحرف الراء .. بالعكس يمكن في البداية كنت اضحك مع الشخص وماكنت فاهم وش يقصد

لكن مع الوقت وتكرر المواقف تأثرت شوي شوي لما تدمرت

صرت شخص قليل الكلام جدا لاني اخاف احد يتنمر علي .. طبعا الكلام شي مهم جدا في العلاقة مع الناس

يعني تخيل تجلس في مكان وعدد الكلمات اللي تقولها ماتتجاوز اصابع اليد .. هذا شي متعب

حتى كثير من الناس صارت تسالني ليش ماتتكلم وتخيلوا صار البعض يسخر مني مثلا يقولون الفتى الصامت ههههههه

يعني اذا تكلمت ماسلمت واذا سكت ماسلمت

ياجماعة والله بدون مبالغة جلست سنوات طويلة جدا اتجنب اي كلمة فيها حرف الراء واحاول بكل جهدي لو اضطريت اقول كلمة فيها الراء استبدلها بكلمة ثانية مرادفة لها

حتى بعض الاحيان مايجي في بالي مرادف للكلمة واجيب كلمة مقاربة في المعنى لكن ماتوصل الشي اللي ابي اقوله

ترى الشي هذا صار جزء مني يعني ماهو بس برا البيت .. لا حتى مع اهلي في البيت

يعني تخيلوا في ابسط الاشياء مثلا ابوي بيجيب عشاء ويسألنا وش تبون مشروب ويقولي تبي بيبسي او ميراندا اضطر اقول بيبسي مع اني ماكنت احبه وكنت من عشاق الميرندا هههههههه

او مثلا يقول تبون شاورما او فلافل وانا احب الشاورما لكن اختار الفلافل ههههههههه عاد النكبة الكبيرة لما يقول تبي برقر او شاورما هنا اتوهق واقول عادي اي شي

هذا بس امثلة بسيطة .. الامر اثر علي بشكل غير طبيعي حتى في الدراسة

صرت اخاف من حصة القراءة لاني مابي اقرأ تخيلوا اجلس في قلق وخوف لما تنتهي الحصة لاني اخاف المدرس يقولي اقرأ

الامر اثر على شخصيتي ونفسيتي واضعفها بشكل كبير

انا متأكد ان اللي كانوا يتنمرون علي ماكانوا يتصورون مدى التأثر اللي راح اتأثره .. كانوا يتوقعون انه موقف وينتهي في وقته وماله اثر

طبعا التنمر حصل لي من ناس في نفس عمري ومن ناس كبار اكبر مني بكثير

الفترة الاخيرة اخر سنتين تقريبا او ثلاث بديت اتجرأ على الكلام اكثر حتى لو الكلمة فيها حرف راء اقولها

والشي الكويس اني شفت ناس كثير عندهم صعوبة في نطق بعض الحروف وعادي يتكلمون وماهمهم احد

وهذي شجاعة وشي كويس وممكن يكون شي ملهم للي عنده صعوبة في بعض الحروف .. انه اذا شاف غيره عنده هالامر وعادي يتكلم طبيعي فـ يصير يتجرأ على الكلام

طبعا الى الان باقي الاثار في شخصيتي وحتى في علاقاتي وكلامي يعني احاول اتجنب الكلام وحتى بعض الكلمات اللي فيها راء اتجنبها لاني احسها صعبة

يعني تحسنت لكن ماهو بشكل كامل .. تخيلوا مع ان الموضوع قديم مره لكن اثاره مازالت معي

لذلك انتبهوا من السخرية والاستهزاء بالناس ولا تقول هذا صغير وماراح يتأثر !! بالعكس التأثير ممكن يكون اقوى على الصغير ويبقى مجروح طول العمر

طبعا ماهو التنمر بس على طريقة الكلام .. لا حتى على الشكل او الحالة المادية او اي شي

يعني للاسف اشوف كثير جدا ناس تتنمرعلى اللي وزنه زايد .. كثير منهم يكون يمزح مع صديقه او قريبه ويقوله كلمة من باب المزح والضحك

وتلقى المتنمر عليه يضحك ويكتم في قلبه لذلك الناس تحسب انه عادي يتقبل ومايتأثر

وهو كاتم في قلبه وهالشي بيأثر عليه وممكن يدمر شخصيته

احذر تقول كلمة عابرة ماتلقي لها بال وتكون سبب في دمار شخصية انسان

قال تعالى : يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ ۖ وَلَا تَلْمِزُوا أَنفُسَكُمْ وَلَا تَنَابَزُوا بِالْأَلْقَابِ ۖ بِئْسَ الِاسْمُ الْفُسُوقُ بَعْدَ الْإِيمَانِ ۚ وَمَن لَّمْ يَتُبْ فَأُولَٰئِكَ هُمُ الظَّالِمُونَ