نفساني - عرض مشاركة واحدة

07-03-2006, 06:26 PM

السلام عليكم دكتوري الفاضل إبراهيم الدريعي:-

بصراحه أنا أعاني من مشكله وهي إني استويت ما أحس يعني بمعنى آخر إني صرت ما أتأثر بأي شي على الرغم إني إنسانه من النوع الحساس والأهم مب إني حساسه وإنما إن هالطبع ما كان فيني يعني مثلا:-

أنا يوم كانت إختي الكبيره تعصب علي أو أزعلها كنت أتظايق لإني ما أحب أزعلها بأي شي لإني أحبها بس الحين أستغربت من عمري إني يوم تصارخ فيني استويت ما أتأثر بالأصح أحس إن الكلمات كإنها ما توصلني يعني ما أحس فيها وصار عندي عادي والعجيبه إني أزعل لإني المفروض إني أزعل فأنا أحبها وأقدرها بس الأعجب إني مب حاسه من داخلي بزعل أو أي شي بالعكس عادي لدرجه مره قالتلي إني تغيرت واستويت أتجرأ وطالع بعينها وأرد وطبعا أنا عارفه هالشي بس مب وقاحه مني بس شو أسوي إذا أنا ما أحس فما أعرف شفيني؟ جني استويت بليده

ملاحظه:- أنا صرت بالفترات الأخيره وايد أشجع نفسي يعني إذا أي شي زعلني كنت أقول لعمري عادي ودوم أكرررها فأحس شكلي من كثر ما أقول عادي وإن مافي شي يستاهل مني إني أزعل عشانه صار بالفعل كل شي عندي عادي بس المصيبه إني ما صرت أحس والعياذ بالله. وبصراحه صار كل شي عندي عاي فالأهم بالنسبه لي استوا إني أكون مرتاحه وما أصدع راسي بأي شي وكل الي أريده إني أشغل نفسي وطبعا هذا بدراستي بس يوم ما يكون علي شي أحس بملل لإني ما أريد يكون عندي وقت فاضي بالمختصر أريد جدولي اليومي يكون مليان عشان اليوم يمر بسرعه وما أفكر بأي شي.

واسمحلي دكتوري إذا كان كلامي مب واظح فأنا ما أعرف كيف أشرح.

وشكرا

المصدر: نفساني