هلوعه جديده

بيانات اضافيه [ + ]

رقم العضوية : 27722  تاريخ التسجيل :  05 2009  أخر زيارة : 17-11-2009 (04:32 AM)  المشاركات : 55 [ + ]  التقييم :  10

لوني المفضل : Cadetblue

السلام عليكم ورحمة الله وبركاته

كيف حال الجميع ان شاء الله بخير وصحه

سامحوني انا سجلت ودخلت هنا على طول لانه النفسيه الحمدلله بس


المهم اخواتي واخواني انا من مده وانا ادخل واقرا المواضيع هنا وصدقوني لما حسيت انه في ناس زي بتعاني من الخوف والهلع بديت احس انه الامر طبيعي ومنتشر عند الاغلبيه فماادري حسيت بالاطمئنان نوعا ما لاي كنت احسه شي غريب وماكنت اسمع انه يجي لااحد زي كده

المهم بقولكم قصتي مع نوبات الهلع واتمنا تستفيدو منها وتعطوني نصايحكم في كلامي


بدايتي مع النوبات وانا كنت راجعه من بيت اختي طبعا انا من مكه ووقتها كان حج
واحنا راجعين بالطريق الطريق كان واقف من الزحمه ويمكن جلسنا اكتر من ساعه واحنا نستنا تمشي السيارات وبنتي كان في حضني وسبحان الله فجئه حسيت بزي الهبوط وحسيت اطرافي كانها ميته وبديت اعرق واحس ببرد وحوسه ونفسي افك باب السياره واطلع بس قلت اسكت احسن وخلاص حسيت انه الموت

اعطيت اختي بنتي وقلتلها مره تعبانه امسكيها
خافت مسكينه وايشبك ومن الكلام هذا
قلتلها مافي شي بس امسكيها خليني اهدا وجلست استغفر ربي وادعي وانا خلاص حاسه اني راح اموت


المهم مشي اليوم هذا وانا خايفه وحالتي حاله من اللي جاني

رحت للدكتور تاني يوم وقلتله كده وكده قلي يمكن الضغط انخفض وقلي كل اشياء مالحه قلت يمكن ومشيتها


المهم واتكررت الحاله هذه معايا كم مره وانا بالبيت واحوس بنفسي وشويه اكل زيتون شويه اعصر ليمون وخربطه بخربطه


اخر مره فكرت اروح لدكتور نفساني قلت طالما مافي سبب عضوي وبيني بينكم انا عندي شويه ضغوط بحياتي الزوجيه سبحان الله ماادري لها سبب ولا لا


المهم رحت للدكتور وقصيته قصتي كلها وقلي هذه نوبات هلع وزعر قلت اهلان الله يبشرك بالخير

المهم واعطاني اربعه انواع من الادويه وهيا ادرانيل لدقات القلب وزانكس وانفرال ولوسترال واستمريت عليهم حوالي دحين يمكن 10 شهور وحسيت الحمدلله بتحسن كبير وخفت يارب لك الحمد والمنه

وكان الدكتور مركز في كل مره اروحله على التطنيش وانه لازم اقوي نفسي واطنش كل اللي احس فيه اقله مو بيدي يقولي حاولي هيا كده لازم وبيني وبينكم لما قريت مواضيعكم هنا ارتحت اكتر ولقيت انه لازم من جد للحاله هذه المواجهه


الملخص::: دحين الدكتور اللي كنت اروحله خلص عقده وسافر وامس رحت لدكتور معروف بجده اسمه محمد الحامد بمستشفى بخش

رحتله وشاف ملفي وقلي طبيعي مااختفت مره لانه كمية العلاج خفيفه مره وركزلي على اللوسترال والزانكس قالي استمري على اللوسترال اسبوع حبه صباحا وحبه مساء
والاسبوع التاني حبه ونوص وحبه ونوص
والاسبوع التالت حبتين حبتين :(
ومعاه نص حبه باليوم من الزانكس قالي اي وقت بس انا خفت وباخده مرتين زي مااتعود
بيني وبينكم اليوم اول يوم اخد حبه صباحا وحبه مساء وكنت خايفه من الاعراض حقت الدواء بس شجعت نفسي وقلت يابنت هو علاج مو العكس وشغلت نفسي وطنشت ومشيت الامور الحمدلله بخير

المهم قلي لازم مع الادويه تروحي تسوي جلسات عشان تساعدك في الشفاء بسرعه والشافي الله اولا واخيرا وهذا انا حاجزه الثلاثاء الجي وبروح واشوف


خلاصه الكلام ترى الهلع مره مره مره منتشر شكله في شي بالجو ولا ايش الله العالم والله كل يوم والتاني اسمع وحده جاتها النوبه هذه فخلاص خلونا نتوكل على الله ونتعود عليها لغاية ماربنا يكتبلنا الشفاء من عنده وتكون كفاره لنا



مشكلتي اللي ابغى استشيركم فيها هو الخوف من الموت كل يومي وانا اطالع في بنتي واقول راح اتركها واموت واكتئب مع الافكار هذه قلت للدكتور ضحك وقالي ماراح تموتي ولا شي كل اللي جوني اشد من حالتك واتعالجو والحمدلله وقالي انه المشكله مره بسيطه ولها علاج

اتمنا تتفاءلو وتطنشو وتتقو وربي معايا ومعاكم ويشفينا جميعااااااااااااااااااااااااااا


اسفه على الاطاله وعلى عدم الترتيب في الكلام والجمل