|
الحل بين يديك للتخلص من الهلع طرق مجربة.
السلام عليكم ورحمة الله وبركاته
طبعا اليوم راح اقدم لكم حلول مجربها ونجحت وتشافيت من الهلع بنسبة 80%
وحتى الوسواس والافكار الغريبة وكل هذا في شهر وشوي .
طبعا خلوني اقول لكم ان الهلع اذا اصابك لا تروح المستشفى انا اعرف الاعراض الي تجي مع الهلع لكن لما تقول ودوني المستشفى تزيد عندك الحالة
اذا عندنا هنا نقطة ممتازة لازم نفهمها وش معنى اذا قلت ودوني المستشفى او قلت بروح المستشفى تزيد عندك الحالة لهذي الدرجة المرض الي فيك حساس من المستشفيات؟
ام عقلك يفهم الموضوع غلط ويبدا يحذر من خطر غير واقع ؟
بسيطة انت زدت الأمر سوء لما قلت بروح المستشفى وكذا الاعراض تزيد عندك لأن عقلك
فهم الموضوع غلط يظن انك في خطر والخطر غير واقع وتبدا تحس بالضيق وضربات القلب
وتبدا تطيح وتحس رجولك ما تشيلك ويودك المستشفى وفي الأخير ما فيك شيء واصلا الدكتور بيسألك لما تقوله الاعراض الي جتك مثل قلبي يدق بسرعة وضيق وما اقدر اشيل رجولي وحراره بيقولك تفكر او زعلان او متهاوش مع احد شفتوا كيف فليش اروح المستشفى مرة ثانية او ثالثه انت ما تفيد نفسك انت بس تدهور نفسك
لأنهم بيقولون لك مافيك شيء وتبدا تزيد عندك الحاله وتجيك افكار مثل انا انجنيت
وتبدا تفكر باشياء مالها علاقة بالي فيك
كل الي فيك مرض نفسي لا اقل ولا اكثر
والمفروض تروح النفسية وما تأخر اي وقت لأنك لو تأخرت احتمال تزيد صعوبة العلاج
على حسب ما قريت في الانترنت
المهم لو رحت النفسية لازم يعطوك 9 او عشر ايام تجرب العلاج
هل فادك ام لا اترك الآثار الجانبية للعلاج لأنها معروفة ولا توقف العلاج لأني انا اول ما اخذت العلاج جلست افكر اوقفه لأنه عذبني لكن استمريت عليه 9 ايام وملتزم بالوقت الي اخذ فيه العلاج الحمد لله شفت انه فادني وبكذا خلاني استمر على العلاج اذا شفت ان حالتك ما تحسنت من العلاج انصحك كلم الاخصائي وقوله ما فادني وراح يعطيك علاج بديل واذا ما فادك راح يستمر بالبحث عن العلاج المناسب لك وموجود علاجك لا تخاف
انت بس لا تقطع العلاج واصل واتبع كلام الطبيب والا ما راح تفيد نفسك لا تخاف ترى كلنا خفنا اول مرة لكن استمرينا ولله الحمد الحين اكلمكم وانا مرتاح وعلى فكرة
الخوف والحاجات الي كانت ممرضتك تروح وتحس انك مرتاح لأبعد حدود حتى من الممكن تحس انك افضل من اول ويصير كل شيء عندك عادي والي يخاف من الظلمة يصير عنده
ولا شيء
وحتى الأفكار والوسواس يبدا يختفي حبه حبه وانت راح تنسى مع الزمن
|