نفساني - عرض مشاركة واحدة

31-10-2013, 11:02 PM

اهلا بك اخ فارس .. راح افصل حالتك .. بما انك ارسلت لي مسج خاص ..

بتكلم باللغه العامية عشان تفهم كل شيء بشكل واضح .. بس لازم عشان تتعالج تلتزم بالكلام اللي بقوله وان شاءالله امورك بتتحسن ..

بشرحلك حالتك .. كما قال الدكتور رعد .. المرض النفسي مايجي لحاله .. يعني القلق ممكن يكون معه وسواس قهري ومشاعر اكتئاب, فالامراض النفسية متداخله .. والعلاج الدوائي واحد .. يعني العلاج راح يأثر على كل الاعراض اللي تحس فيها .. شوف اخوي انت الحين لا دقق على تشخيص حالتك .. ولا تفكر انا وش فيني .. لأنه هالشيء ماراح يفيدك .. راح يحسسك انك مريض وان الشفاء صعب وكثير من المشاعر المحبطة ..
اول شيء لازم تعرف ان المرض النفسي مرض مثل اي مرض في دنيا .. يعني لا تحس انه مرض خطير وان شيء ماراح تقدر تعيش منه بسعادة وانه راح يدوم معك .. لا اخوي المرض النفسي مرض ممكن يصيب اي شخص في دنيا
مثل مالجسم يتعب ويصاب بالزكام والا حراره .. كمان النفس تضعف وتصاب بمرض نفسي مثل القلق والاكتئاب .. يعني لا تعظم صورة المرض النفسي وتحس انك مريض وان الحياة صعبة .. بسط الامور تتبسط ..
مرض يصيب اي شخص في طرق لعلاجه .. في ادوية وفي طرق نفسية تسويها .. وكل شيء بأذن الله يرجع طبيعي .. هالمرض ممكن يعلمك كيف تقوي نفسك طور نفسك تثقف نفسك , تتعلم كيف تصبر , تحس بالاخرين , تعرف قيمة الحياة , تلجاء لربك , تسوي اعمال خير , تساعد غيرك .. يعني تقدر انك تخلي هالتجربة صعبه شيء يفيدك ويطورك ويساعدك انك اقوى .. الله عندما يبتلي عبد يبغا يشوف قدرة العبد على تغلب على صعوبات
يعني هالشيء خير لك .. كل ابتلاء من الله خير .. يريد به نفعا للعبد .. عشان كذا انا ابغاك الحين انك تغير نظرتك عن المرض .. اذا استمريت ترفضه وتخاف منه .. كذا انت جالس تخلي حالتك تسوء اكثر ..
عشان تقبل واعتبره ابتلاء من الله , واعتبره تجربه راح تقويك وطورك بأذن الله

ثأنيا لا تقرا بتشخيص الامراض في النت ابدا لأن هالشيء رح يزيد توترك وراح تحس كل عرض فيك .. مهما حسيت انك تبغا تقرا امنع نفسك .. لأن كل مرض بتقرا عنه بتوسوس انه فيك وبتطلع الاعراض فيك وهكذا .. ابعد عن تشخيص الامراض النفسية والعضوية ..

ثالثا: انك تعرف سبب القلق اللي اصابك .. المرض النفسي سببه يكون وراثي .. يعني من يوم ماولدت عندك استعداد وراثي انك معرض للاصابة بمرض نفسي ( كما ذكرت والتدك مصابة بمرض نفسي ) هذا الاستعداد الوراثي
يخليك تصاب بالمرض النفسي لما تواجهك صعوبات وضغوطات هنا يظهر لك المرض ... انت بفترة مراهقة ومن الاكيد انك كنت تفكر بمتسقبلك وحياتك .. وكان عندك مخاوف وقلق عادي .. بس زاد مع الايام بسبب الاستعداد الوراثي .. هذا سبب المرض لأنك كنت تبغا تعرف .. بس الحين مو مهم السبب .. المهم كيف تقدر تتخلص منه ؟؟

رابعا : القلق النفسي هو اللي سبب لك الوسواس القهري وهو اللي سبب لك الاعراض الجسمية اللي تشعر فيها مثل الدوخة وقلة النوم , وصعوبة البلع , كل هذه اعراض القلق ..
بالبدايه اخوي جدا جدا مهم انك تأخذ علاج نفسي .. عشان ينظم لك عمل ناقلات العصبية في المخ < هذه الناقلات لما يصاب الشخص بمرض نفسي يختل توازن .. يترتفع ياتنقص وتسبب المرض النفسي .. الدواء مهمته يرجع توازن لهذه الناقلات .. من ثم راح يتعدل مزاجك , وتروح الاعراض الجسمية اللي تشعر فيها .. عشان كذا جدا مهم بالبداية انك تأخذ الدواء النفسي لمدة 6 اشهر ..
ولازم تعرف ان الدوء النفسي لا يسبب ادمان .. ممكن يكون في اعراض جانبية للدواء .. بس هذه الاعراض لازم تتحملها عشان العلاج .. بس تحملها ببداية العلاج وان شاءالله تزول ..
انك تعاني من اعراض جانبية عادية اهون بكثير من انه يستمر معك المرض ؟؟ عشان كذا اخوي ابعد عن كلام الناس في النت واسمع لطبيبك بس .. واعرف ان تجارب غيرك مو مثل تجربتك .. الناس يحبطون ودايم سلبين .. يعني لا تأخذ بكلامهم .. انت التزم بالعلاج واي مشكله في العلاج ارجع لطبيب فقط .. عشان كلام ناس راح يشتتك ويزيد حالتك سوء .. هاذي اهم نقطة

خامسا : مع العلاج الدوائي .. لازم تستمر على العلاج المعرفي السلوكي .. لأنه جدا مهم في تغيير افكارك .. افكارك هي المسبب الرئيسي للمرض .. اذا قدرت انك تتحكم بأفكارك بتقدر تتحكم بكل حياتك ..
بشرح لك العلاج بشكل مبسط .. في حوار يدور بينك وبين نفسك هذا اسمه الحوار الداخلي .. من خلال هالحوار تفسر الامور من حولك .. يعني مثلا حسيت بدوخة .. هنا ع طول عقلك يفسر الحدث ..
يقولك وش هالدوخة لا يكون شيء خطير انت ترد عليه اكيد شيء خطير مو طبيعه انا وش فيني وهكذا حوار تفسر فيه اي شيء يصير لك .. هالحوار عبارة عن افكار متتابعة سلبية تفسر الامور من حولك بسلبية وغير واقعية
انت هنا لو استمريت بالحوار بدون ما توقفه او تعدله .. هالحوار بيأثر على مشاعرك ( بتحس بخوف - قلق - حزن - ) اذا حسيت بالقلق مثلا بيأثر هالشيء على جسمك ( بتحس يالدوخة - زيادة في ضربات القلب - ضيق التنفس )
بعدين بيأثر على سلوكك بيخليك ماتطلع من البيت ماتقوم بأعمالك ماتذاكر ماتطلع مع اصحابك .. يعني اخوي الأفكار والحوار اللي يصير بينك وبين نفسك هو السبب في شعور وهو سبب في اعراضك الجسمية وهو سبب في سلوكك وتصرفاتك ..

جدا مهم انك تنتبه لهذا الحوار .. توقفه على طول .. ترد عليه بعقلانية وبأفكار واقعية بعيده عن سلبية والبمالغه وتوقع الخطر ..

كتبت جلسات في قسم الرهاب الاجتماعي شرحت كيف نوقف الناقد السلبي < الناقد السلبي يعني افكارك اللي تسبب القلق والخوف واللي تسبب شعورك بالاعراض الجسمية ..

اطلع ع موضوع وطبق .. كيف توقف ناقد .. كيف ترد عليه ..

تعلم كيف تسترخي .. طبق جلسات الاسترخاء .. استمر على العلاج الدوائي

لا تستلم واذا تعبت لا توقف استمر ,, اذا حسيت ان الاعراض ماتحسنت استمر بالعمل .. اهم نقطه انك ماتوقف المحاولة ..

وأي سؤال انا موجوده اخوي

انا هنا معك ..